Paotr Treoure

Paotr Treoure a oa anv-pluenn Augustin Konk, beleg a Vro-Leon, brudet ivez evel An aotrou Konk.

Dindan meur a stumm e kaver e anv-pluenn : Paotr Treoure^[1], Paotr-Tréouré^[2], Potr Treoure^[3]… Hervez katalog Levraoueg broadel Bro-C'hall ez eo Paotr Treoure ar stumm etrebroadel^[4].

D'ar 16 a viz Here 1874 e voe ganet Augustin Konk e Treoure, e parrez Plougin. E skolaj Lesneven e reas e studi kent bezañ beleget e 1898. Kure e voe e Kastell-Paol, person e Lokenole goude-se ; e 1930 e voe person e Plouneour-Traezh, ma chomas betek e varv d'ar 26 a viz Kerzu 1952 e Kastell-Paol.

Er skolioù katolik e veze lakaet ar vugale da zeskiñ e vojennoù dre an eñvor, evel ma veze desket Fablennoù Jean de la Fontaine e galleg.

E 2021 ez eus bet embannet ur bladenn gant TES, enni darn eus e vojennoù, asambles gant re all, troet e brezhoneg diwar fablennoù La Fontaine gant meur a aozer ha lennet gant meur a vouezh (Mari Kermareg, Loeiza Beauvir, David ar Gall...)^[5].

• Barzaz ha Soniou evit ar vugale (Presse Libérale, Brest, 1935, nemet bloavezh ebet merket war al levrig) gant barzhonegoù ha kanaouennoù. Adembannet div wech :
  • Mojennou ha Soniou (Imprimerie Centrale de Bretagne, Rennes, hep bloavezh), adembannadur kresket eus al levr kentañ, graet war-lerc'h an Eil Brezel-bed, ennañ ur rakskrid gant ar chaloni Frañsez Falc'hun. Darn eus ar skridoù a voe implijet gant Radio-Kimerc'h.
  • Mojennou, Brud Nevez, 1982.

Un toullad kanaouennoù zo bet savet gantañ^[6], war tonioù eus Bro-Skos, Kembre, Kernev-Veur, SUA ; re all kempennet hepken. En o zouez :

• Gwir Vretoned, war ton Seziz Gwengamp, e Barzhaz Breizh, bet brudet bras ;
• Marijanig Lagadbran, dastumet ha kempennet gantañ (hep ma oufed resis diwar beseurt danvez), kanet en ur bern skolioù Diwan ;
• Mari Vastrouilh, savet gantañ war un ton eus SUA ;
• Va zi bihan, diwar ur ganaouenn eus Kembre, bet enrollet gant Eliane Pronost ;
• Luskell va bag, diwar ur c'han a Vro-Skos, The Skye boat song ;
• Good onions, very cheap, diwar-benn ar Jonied ;
• Ar bloaz nevez, diwar un ton eus Kembre ;
• Yannig an difouper neiziou, war don gavotenn an Aven (ha hini ar ganaouenn Matilin an Dall), savet pe gempennet.

• Abeozen : Istor lennegezh vrezhonek an amzer vremañ (Al Liamm).

• Al louarn hag ar rezin
• Al louarn besk
• Ar vran hag al louarn
• Mojennoù

• Oberennoù Paotr Treoure er CRBC Brest