Gitar

Gitar inggih punika silih tunggil piranti musik sané nganggén 6 senar.^[1] Senar punika patut kapetik utawi kagenjréngin nganggén jriji apang sida suaran nyané kapiragiang. Gitar kawangun antuk wangun utama tur madaging genah ngiket senar ring muncukné. Gitar ketah kauningin madué senar nenem. Sakéwanten wénten sané madaging roras senar. Lakar sané kaanggén makarya gitar nika akéh, sakéwanten pamekas lakar nyané nganggén kayu. Punika taler lakar senar nyané wénten sané nganggén nilon (tali pancing) utawi waja.

Gitar kakepah dados kalih, minakadi gitar akustik tur gitar éléktrik. Yéning gitar akustik, wangun utama nyané madaging bolong. Gitar akustik puniki kakepah malih dados tiga, minakadi gitar akustik masenar nilon, gitar akustik masenar waja, tur gitar sémi-akustik (archtop). Gitar éléktrik inggih punika gitar sané nénten madaging bolong ring wangun utama nyané. Gitar puniki patut nganggén listrik apang suaran nyané kapiragi. Gitar éléktrik ketah kauningin pinaka piranti musik blues, country, reggae, jazz, metal, rock, miwah musik pop.