Xensericu

Xensericu
rey de los vándalos (es) 435 - 477 - Hunerico (es) →
Vida
Nacimientu	Llagu Balatón, 389 (greg.)[1]
Nacionalidá	Reinu Vándalu
Muerte	Cartago, 477 (greg.)[1] (87/88 años)
Familia
Padre	Godexisiliu
Fíos/es	Hunerico (es) Gento Theoderich
Hermanos/es	Gunderico (es)
Pueblu	Asdingos
Oficiu	soberanu

Xensericu (del vándalu Gaisarīks, que significa «príncipe de la xabalina»; c. 389-25 de xineru de 477) foi rei de vándalos y alanos ente 428 y 477. Foi pieza clave nos conflictos asocedíos nel sieglu V nel Imperiu romanu d'Occidente, y mientres los sos casi cincuenta años de reináu alzó a una tribu xermánica relativamente insignificante a la categoría de potencia mediterranea.

Fíu illexítimu del rei vándalu Godexisiliu, supónse que nacío nes cercaníes del llagu Balatón alredor del añu 389. Elixéronlu rei en 428 a la muerte del so mediohermanu Gundericu. Brillante y conocedor nel arte militar, buscó rápidamente'l mou d'aumentar el poder y la prosperidá del so pueblu, que moraba entós daquella na Hispania Bética y que sufriera los ataques de los visigodos. Asina, pocu dempués d'aportar al tronu, Xensericu decidió dar Hispania a los sos rivales, emplegando pa ello la poderosa flota creada baxo'l reináu del so predecesor.

Aprovechando les disputes de Bonifaciu —gobernador romanu d'África del Norte— cola metrópolis, 80.000 vándalos —15.000 d'ellos homes d'armes— cruciaron l'estrechu de Xibraltar na primavera de 429, partiendo de Tarifa y «Iulia Traducta» y desembarcando en Ceuta. Tres delles victories sobre unos defensores romanos débiles, fízose col control d'un territoriu que diba dende l'actual Marruecos al norte d'Arxelia, poniendo baxo asediu la ciudá d'Hipona, que tomaríen al cabu de catorce meses de duros combates. Al añu siguiente, l'emperador Valentinianu III hubo de reconocer a Xensericu como soberanu de toos estos territorios.

En 435 Xensericu llegó a un alcuerdu col Imperiu romanu, pol que'l reinu vándalu pasa a ser foederati de Roma cola concesión de Numidia. Sicasí, en 439 Xensericu tomó —al paecer ensin llucha— la ciudá de Cartago, prindando la flota imperial ellí atracada. Con esti movimientu fixo a los vándalos dueños del Mediterraneu Occidental, apoderándose de siguío de bases marítimes de gran valor estratéxicu y comercial: les Islles Baleares, Córcega, Sicilia y Cerdeña. Como resultes, Roma quedó ensin una de les mayores zones de producción cerealística del vieyu mundu, y tuvo de mercar dende esi momentu'l granu del norte d'África pal so propiu suministru.

En 455, l'emperador romanu Valentinianu III morrió asesináu, asocediéndolu Petroniu Máximu. Xensericu, considerando rotu'l tratáu de paz robláu con Valentinianu en 442, desembarcó n'Italia y marchó sobre Roma. La población rebelóse escontra'l nuevu emperador y dio-y muerte. Trés díes dempués —el 22 d'abril de 455— los vándalos tomaron ensin resistencia la ciudá y saquiáronla.

El papa Lleón Magnu nun foi a torgar que los vándalos de Xensericu, al aportar a les puertes de Roma, invadieren la ciudá indefensa, que saquiaron casi mientres dos selmanes. Sicasí, l'actuación del Papa que salió al pasu del invasor pa pidi-y que se detuviera, llogró evitar que Roma fuera amburada y que nun se saquiaren les basíliques de San Pedru, de San Pablu y de San Xuan, nes que s'abellugó parte de la población axorizada.

Magar los vándalos fixeron atroxu de gran cantidá d'oru, plata y oxetos de valor, el saquéu nun estropió la ciudá en gran midida. Xensericu llevó consigo a Cartago como rehenes a Licinia Eudoxa, vilba de Valentinianu, y a les sos dos fíes, Placidia y Eudoxa; esta postrera contrayería matrimoniu col so fíu y socesor, Hunericu.

En 468, el reinu de Xensericu hebo d'enfrentase al últimu esfuerciu militar conxuntu de les dos metaes del Imperiu romanu. Sicasí, el rei vándalu llogró ganar, frente al cabu Bon, a una poderosa flota empobinada pol que depués sería emperador bizantín Basiliscu. Nel branu del 474 robló la paz perpetua con Constantinopla, pola que Bizanciu reconoció la soberanía vándala sobre les provincies norteafricanes, Baleares, Sicilia, Córcega y Cerdeña.

Na so política interna, Xensericu toleró en dellos momentos el catolicismu, magar esixó la conversión a la doctrina arriana de los sos conseyeros más cercanos y fizo numberoses confiscaciones de bienes de la Ilesia católica, que convertiríase asina nuna poderosa fuercia opositora a la monarquía vándala. Tamién dio llugar a escorrexes de católicos que nun aceutaron l'arrianismu, como les persecuciones nel Norte d'África na que resultaron mártires nel 462 San Armogastes, San Arquinimu y San Saturnu.

Debilitó de mou sangrín a la nobleza tradicional vándalu-alana, sustituyéndola por una corte adicta a la so propia familia, y allixeró la presión fiscal sobre la población a cuenta de les families riques d'orixe romanu y del cleru católicu.

Xensericu morrió'l 25 de xineru de 477, ocupando'l tronu'l so fíu Hunericu.

• Wikimedia Commons acueye conteníu multimedia sobre Xensericu.

• Gautier, E.F.: GENSERIC, roi des vandales. Payot, 1951
• Gourdin, Henri: GENSERIC, soleil barbare. Paris-Méditerranée. 1999
• Pirenne, Henri: MAHOMA Y CARLOMAGNO. Alianza, 1993.
• Procopius of Caesarea: HISTORY OF THE WARS; SECRET HISTORY BOOKS III ANDIV VANDALIC WAR. Harvard University Press, 1916.
• Tacitus Cornelius: GERMANIA. J.B. Rives. Clarendon Press, 1999.
• Varela, Darío: GENSERICO, rey de los vándalos. Editorial Kódigos. Valencia, 2007.
• Vita, Victor of: HISTORY OF THE VANDAL PERSECUTION. Moorhead, J. W., Translator. Liverpool University Press. 1992.