Llinia C-6 (Cercaníes Asturies)

Llinia C-6 (Cercaníes Asturies)
serviciu de tren
Llocalización
País	España
Autonomía	Principáu d'Asturies
Historia y usu
Dueñu	Administrador de Infraestructuras Ferroviarias
Xestión	Renfe Feve
Vía de tren
Anchu de vía	anchu métricu

La llinia Uviéu-L'Infiestu, tamién conocida como la llinia C-6f y enantes F-6, ye una llinia de cercaníes per vía estrecha de la rede de cercaníes d'Asturies xestionada por Renfe Feve. La llinia percuerre los conceyos d'Uviéu, Siero, Nava y Piloña.

Escurre íntegramente pela llinia Uviéu-Santander d'Adif, ente les estaciones d'Uviéu y L'Infiestu-Apeaderu. El percorríu tien una longtitud de 47,70 quilómetros y cuenta con 20 estaciones.

La llinia ta electrificada ente Uviéu y Ribeseya, y fornida de doble vía nel tramu ente Uviéu y La Carrera de Siero. Ta prevista estender la vía doble hasta Pola de Siero.^[1]

Comparte la infraestructura con servicios rexonales ente Uviéu, Llanes y Santander y – na sección Uviéu-El Berron – cola llinia C-9. Cruciase cola llinia C-5 Xixón-Llaviana n'El Berrón. N'Uviéu enllaza cola llinia C-7f Uviéu-San Esteban y servicios rexonales a Ferrol, y coles llinies C-1, C-2 y C-3 de Renfe Cercaníes.

La llinia foi estendida hasta la estación de L'Infiestu-Apeaderu nel 2009.^[2]​ Hasta'l 2012, la llinia yera operada por FEVE, pasando a ser operada pola división de Renfe Operadora Renfe Feve el 1 de xineru de 2013.

Nel 2019, cuenta con 11 frecuencies diaries por sentíu en díes llaborables que percuerren el trayectu ente Uviéu y L'Infiestu Apeaderu n'aprosimao una hora y cuartu. Los servicios de la llinia son complementaos por 15 frecuencies diaries ente Nava y Uviéu y por trés frecuencies por sentíu de trenes rexonales procedentes o con destín Santander o Llanes.^[3]

Cuntaba, nel 2016, con 1463 viaxeros diarios, un 31,6% menos qu'en 2008.^[4]