Noruegu

Les llingües falaes anguaño n'Escandinavia desendolcáronse a partir del nórdicu antiguu, que la so estensión nun difería enforma de les árees onde güei se fala danés, noruegu y suecu. Ello ye que los comerciantes viquingos estendieron la llingua per Europa hasta Rusia, faciendo del nórdicu antiguu una de les llingües más estendíes del so tiempu. Según la tradición, el rei Harald Melota Formosa llevó la unidá a Noruega en 872. Nesta dómina taba n'usu un alfabetu rúnicu. Acordies colos escritos topaos nes tables de piedra d'esti periodu históricu, la llingua amosaba una notable falta d'esviación ente distintes rexones. Les runes taben usándose dende'l sieglu III. Sobre l'añu 1030, el cristianismu llegó a Noruega, trayendo consigo l'alfabetu llatín. Los primeros manuscritos noruegos qu'usaron el nuevu alfabetu empezaron a apaecer un sieglu dempués, pola mesma dómina na que'l noruegu empezó a estremase de los sos vecinos.

Los esploradores viquingos empezaron a establecese n'Islandia nel sieglu IX, portando consigo la llingua nórdica antigua. Col tiempu, el nórdicu antiguu foi estremándose en dos variantes: la occidental y l'oriental. El nórdicu occidental tomaba Noruega (incluyíos los sos asentamientos marinos n'Islandia, Groenlandia, les Islles Feroe y les Islles Shetland) y l'oriental, Dinamarca y Suecia. Les llingües d'Islandia y Noruega caltuvieron la so semeyanza hasta aproximao l'añu 1300, cuando se convirtieron no que güei se conoz como islandés antiguu y noruegu antiguu.

Mientres el periodu tradicionalmente fecháu ente 1350 y 1525, el noruegu sufrió una transición pasando del noruegu mediu al noruegu modernu. Los mayores cambeos fueron una simplificación de la morfoloxía, una sintaxis más fixa y una adopción considerable de vocabulariu del baxo-alemán mediu. Un desenvolvimientu similar tuvo llugar en suecu y danés, calteniendo'l continuum dialeutal intactu na Escandinavia continental. Sicasí, nun asocedió lo mesmo en feroés nin n'islandés, polo qu'estes llingües perdieron la intelixibilidá mutua mientres esti periodu.

En 1397, la Unión de Kalmar unificó Noruega, Suecia y Dinamarca, y dende 1536 Noruega tuvo apoderada pol Reinu de Dinamarca y Noruega. El danés convirtióse na llingua escrita más común ente la clase culta de Noruega. El danés faláu foi adoptáu gradualmente pola élite urbana, de primeres nos eventos formales, y progresivamente fue adoptándose una variedá más relaxada pal discursu cotidianu. Esta variedá pasó por un procesu de koineización, qu'incluyía una simplificación gramatical y una pronunciación a la noruega. Col fin de la unión, en 1814 la llingua koiné dano-noruega pasara a ser la llingua materna d'una parte sustancial de la élite noruega, pero la variedá más solemne —con un soníu más cercanu al danés— siguió siendo utilizada n'ocasiones formales.

Pocu depués del fin de la unión con Dinamarca, Noruega foi forzada a entrar nuna nueva unión personal con Suecia. Sicasí, los noruegos empezaron a reclamar la independencia abrazando la democracia ya intentando faer cumplir la declaración constitucional de ser un estáu soberanu. Parte d'esti movimientu nacionalista concentróse nel desenvolvimientu d'una llingua noruega independiente. Embaraxábense trés posibilidaes: nun faer nada (llingua noruega escrita, esto ye: danés, distintu del suecu), norueguizar la llingua danesa, o construyir una nueva llingua nacional a partir de los dialeutos noruegos modernos. Los trés víes fueron puestes en práutica.

Dende la década de 1840, dellos escritores esperimentaron con un danés norueguizáu qu'amestaba pallabres descriptives del paisaxe y la vida popular noruegos, y qu'adoptaba una sintaxis más noruega. Knud Knudsen propunxo camudar la ortografía y la flexón gramatical acordies cola koiné dano-noruega, conocida como «fala cotidiana culta». Los axustes nesta direición fueron aplicaos progresivamente en trés reformes oficiales en 1862, 1907 y 1917.

Mentanto, un movimientu nacionalista lluchaba pol desenvolvimientu d'un nuevu noruegu escritu. Ivar Aasen, un llingüista autodidacta, entamó la creación d'una nueva llingua noruega a los 22 años. Viaxó per tol país, comparando los dialeutos de distintes rexones, y analizó la evolución del islandés, qu'en gran midida safara les influencies que llegaren al noruegu. Aasen llamó al so trabayu, publicáu en dellos llibros ente 1848 y 1873, landsmål («llingua nacional»). El nome de landsmål interprétase dacuando como «llingua rural» o «llingua del campu», pero paez evidente qu'esti nun yera'l sentíu que-y otorgaba Aasen.

El nome de la llingua danesa en Noruega foi una tema de gran alderique mientres el sieglu XIX. Los sos proponentes afirmaben que se trataba de la llingua común de Noruega y Dinamarca, y que nun yera más danesa que noruega. Los partidarios del landsmål pensaben que'l calter danés de la llingua nun tenía de ser escondíu. En 1899, Bjørnstjerne Bjørnson propunxo'l nome neutru riksmål, que, al igual que landsmål, significa «llingua nacional». Esti nome adoptóse oficialmente cola reforma ortográfica oficial de 1907. El nome riksmål interpretábase n'ocasiones como «llingua estatal», pero esti sentíu ye como muncho secundariu, si lu comparamos col rigsmål danés, d'onde provién el nome.

Tres la disolución de la unión personal con Suecia en 1905, dambes llingües siguieron desenvolviéndose y algamaron lo qu'anguaño se considera les sos formes clásiques tres la reforma de 1917. El riksmål foi renombráu como bokmål («llingua del llibru») en 1929, y el landsmål pasó a llamase nynorsk («nuevu noruegu»). Una propuesta pa sustituyir «dano-noruegu» por bokmål salió perdiendo nel parllamentu por un solu votu. El nome nynorsk, el términu llingüísticu pal noruegu modernu, foi escoyíu pa contrastar col danés y sorrayar la conexón histórica col noruegu antiguu. Anguaño esti sentíu práuticamente perdióse y davezu entiéndese como un «nuevu» noruegu n'oposición al «auténticu» noruegu bokmål.

El bokmål y el nynorsk fixéronse más próximos con una reforma entamada'n 1938, como resultáu d'una política estatal que pretendía fundir el nynorsk y el bokmål nuna sola llingua, llamada samnorsk («noruegu común»). Una encuesta de 1946 amosó qu'esta política yera sofitada por un 79 % de los noruegos naquella dómina. Sicasí, los oponentes de tala política consiguieron crear un movimientu masivu de protesta contra'l samnorsk na década de los cincuenta, atacando especialmente l'usu de formes radicales» nos llibros de testu en bokmål usaos nes escueles. Na reforma de 1959, revocóse parcialmente la reforma de 1938, pero modificóse'l nynorsk entá más escontra'l bokmål. Dende entós el bokmål siguió reculando escontra'l riksmål tradicional, ente que el nynorsk entá s'empón pol estándar de 1959. Amás, una pequeña minoría d'entusiastes del nynorsk usa un estándar entá más conservador llamáu høgnorsk. La política del samnorsk tuvo bien poca influencia dempués de 1960, y foi oficialmente refugada en 2002.

El sistema sonoru del noruegu ye similar al del suecu. Esisti considerable variación ente los distintos dialeutos, pero la variedá que de normal s'enseña a los estudiantes estranxeros ye'l standard østnorsk.

El noruegu ye una llingua de tonu marxinal con dos estructures tonales (tonos o acentos), utilizaes pa estremar les pallabres de dos sílabes que de lo contrario tendríen una pronunciación idéntica.^[5] Por casu, en munchos dialeutos orientales del noruegu, la pallabra bønder («granxeros») pronúnciase col tonu 1, mientres que bønner («fabones» o «oraciones») faise col tonu 2, como en danés. Anque dacuando la diferencia ortográfica dexa estremar una pallabra de la otra, na mayoría de los casos, los pares mínimos suelen escribise igual, una y bones el noruegu nun tien marques acentuales esplícites. Na mayoría de los dialeutos orientales de tonu baxu, l'acentu 1 consiste nun tonu baxu y planu na primera sílaba, y l'acentu 2, un tonu altu, que cai abruptamente na primera sílaba y un tonu baxu nel empiezu de la segunda sílaba. En dambos acentos, estes variaciones de tonu van siguíes d'una xubida de calter entonativu (acentu sintagmáticu), que la so presencia ya intensidá indica énfasis y correspuéndese cola función del acentu normal» de les llingües qu'escarecen de tonu léxicu, como l'español. Esa xubida remata na sílaba final d'un sintagma acentual, ente que la cayida de final d'enunciáu, tan común na mayoría de les llingües, ye o bien bien pequeña o bien inesistente.

Esiste una variación significativa nel acentu d'altor ente los distintos dialeutos; asina, na mayor parte de Noruega occidental y septentrional (los llamaos «dialeutos de tonu altu»), l'acentu 1 cai, ente que l'acentu 2 xube na primera sílaba y cai na segunda, o na proximidá de la llende silábica. Los acentos d'altor (según el peculiar acentu sintagmáticu de los dialeutos de tonu baxu) otorguen al noruegu un soníu cantariegu», que dexa estremalu fácilmente d'otres llingües. Ye interesante notar que l'acentu 1 de normal apaez en pallabres que yeren monosilábiques en nórdicu antiguu, y l'acentu 2 en pallabres que yeren polisilábiques.

L'alfabetu noruegu consta de 29 lletres.

Les lletres «c», «q», «w», «x» y «z» utilícense namás en préstamos. Dalgunes persones escriben los sos apellíos noruegos faciendo usu d'estes lletres.

Dalgunes de les lletres acepten l'usu de diacríticos: é, è, ê, ó, ò, â y ô. En nynorsk tamién s'usen dacuando ì, ù y ỳ. Los diacríticos nun son obligatorios, pero en ciertos casos dexen estremar ente distintos significaos d'una pallabra, por casu: for («para»), fór (verbu «dir» en pasáu), fòr («riegu») y fôr («forraxe»). Los préstamos pueden llevar otros diacríticos, principalmente ü, á y à.

Como asocede n'otros países europeos, Noruega tien un comité d'asesores» —Språkrådet (Conseyu Llingüísticu Noruegu)— que determina, col vistu bonu del ministru de cultura, la ortografía, gramática y vocabulariu oficiales de la llingua noruega. El trabayu d'esti comité tuvo somorguiáu nel discutiniu mientres años, y entá-y queda munchu trabayu por faer.

Tanto'l nynorsk como'l bokmål tienen una gran variedá de formes opcionales. El bokmål qu'usa les formes más cercanes al riksmål conozse como «conservador» o «moderáu», dependiendo del puntu de vista, ente que el bokmål que fai usu de formes más cercanes al nynorsk conozse como «radical». El nynorsk tamién tien formes más cercanes al landsmål orixinal y formes más cercanes al bokmål.

Los que s'oponíen a les reformes ortográfiques qu'intentaben averar el bokmål al nynorsk siguen utilizando'l nome riksmål y empleguen la ortografía y gramática anteriores al movimientu del samnorsk. El riksmål y les versiones conservadores del bokmål fueron l'estándar de facto pa la llingua escrita de Noruega mientres la mayor parte del sieglu XX, siendo usaes nos grandes periódicos, nes enciclopedies y en gran parte de la tradición lliteraria. Amás de ser la forma emplegada per una gran parte de la población de la capital (Oslu), de les zones cercanes a la mesma y d'otros nucleos urbanos. Dende les reformes de 1981 y 2003 (a valir dende 2005), el bokmål oficial puede afaese hasta ser práuticamente idénticu al riksmål modernu. Les diferencies ente riksmål y bokmål podríen comparase coles diferencies ente l'inglés británicu y l'americanu. L'Academia Noruega regula l'usu del riksmål, determinando lo que se considera ortografía, gramática y léxicu aceptables.

Esiste tamién una forma non oficial de nynorsk, llamada høgnorsk, que refuga les reformes posteriores a 1917 y, poro, ye más cercana al landsmål orixinal de Ivar Aasen. La Unión de Ivar Aasen promociona l'usu del høgnorsk, pero hasta agora'l so espardimientu nun foi bien estensa.

Cerca del 86,2 % de los alumnos de primaria y secundaria en Noruega recibe la so educación en bokmål, mientres que'l 13,8 % fáenla en nynorsk. A partir del octavu cursu ye necesario que los alumnos apriendan a escribir dambes formes. De los 431 conceyos noruegos, 161 espunxeron el so deséu de comunicase coles autoridaes centrales en bokmål, 116 (que conformen el 12 % de la población), en nynorsk, y 156 más se declaren neutres. De les 4.549 publicaciones estatales del añu 2000, el 8 % fueron en nynorsk y el 92 % en bokmål. Los grandes diarios nacionales (Aftenposten, Dagbladet y Verdens Gang) publíquense en bokmål. Dellos de los principales diarios rexonales (incluyíos Bergens Tidende y Stavanger Aftenblad), según munches revistes polítiques y diarios locales, usen tanto'l bokmål como'l nynorsk.

Esiste un alcuerdu xeneral alrodiu de cómo l'amplia gama de diferencies fai difícil envalorar el númberu de dialeutos noruegos. Les variaciones en gramátiques, sintaxis, léxicu y pronunciación trespasen les fronteres xeográfiques y pueden crear dialeutos distintos d'una aldega a otra. Los dialeutos, amás, pueden llegar en dellos casos a ser tan distintos que son inintelixibles pa los ensin familiarizar con ellos. Munchos llingüistes señalen un enclín escontra la rexonalización de los dialeutos, lo que provoca l'amenorgamientu de les diferencies a nivel llocal. Esiste, sicasí, un anováu interés pola preservación de los distintos dialeutos.

De siguío amuésense delles frases onde pueden reparase delles de les diferencies ente bokmål y nynorsk, comparaes col conservador bokmål (más cercanu al danés), el nórdicu antiguu, el suecu, el feroés, l'islandés (la llingua viva más cercana al antiguu nórdicu) y otres llingües xermániques modernes.

Los sustantivos noruegos flexiónense o declinen en determinación (determináu/indetermináu) y en númberu. En dellos dialeutos, los nomes determinaos tórnense tamién en casos (nominativu/dativu).

Como na mayoría de les llingües indoeuropees, los sustantivos clasifíquense por xéneru, qu'obliga a la concordanza con axetivos y determinantes. Los dialeutos noruegos tienen trés xéneros: masculín, femenín y neutru, sacante'l dialeutu de Bergen, que solo tien dos: común y neutru. El bokmål y el standard østnorsk tradicionalmente consten de dos xéneros, como en danés (y como'l dialeutu de Bergen), pero les variedaes llamaes «radicales» tienen trés. Anguaño'l modelu de dos xéneros foi na so mayor parte sustituyíu pol de trés en standard østnorsk faláu, pero n'ocasiones caltiénse nel bokmål «conservador».

La declinación de los sustantivos regulares depende del xéneru. Dellos dialeutos y variedaes de nynorsk amplíen la declinación tomando en considerancia los neutros y femeninos débiles y fuertes.

A fecha de 1 de xunetu de 2005, ta permitío escribir tolos nomes femeninos como masculinos.

Los axetivos noruegos tienen dos paradigmes flexivos. La flexón débil aplícase cuando l'argumentu ye definíu; la flexón fuerte, cuando l'argumentu ye indefiníu. En dambos paradigmes, l'axetivu declínase en grau (positivu/comparativu/superlativu). Los axetivos fuertes en grau positivu tórnense amás en xéneru y númberu, concordando col so argumentu. En dellos dialeutos del suroeste, los axetivos débiles en grau positivu tamién se tornen en xéneru y númberu, con una forma pal femenín y el neutru y otra pal masculín y el plural.

Los verbos finitos noruegos flexiónense o conxuguen en mou: indicativu/imperativu/suxuntivu. El mou suxuntivu apaez solo nunos pocos verbos. Los verbos n'indicativu conxúguense en tiempu, presente/pasáu. En bokmål y standard østnorsk, el presente tamién tien una forma pasiva. En dellos dialeutos, los verbos n'indicativu tamién se conxuguen d'alcuerdu al númberu. La conxugación d'alcuerdu al xéneru yá nun esiste en noruegu.

Esisten cuatro formes verbales non finites: infinitivu, infinitivu pasivu y los dos formes de participiu: perfectivu/pasáu ya imperfeutivu/presente.

Los participios son axetivos verbales. El participiu imperfeutivu nun se torna, pero'l perfectivu declínase en xéneru (non en bokmål nin en standard østnorsk) y en númberu, como los axetivos fuertes en grau positivu. La forma definida del participiu ye igual que la forma plural.

Al igual qu'asocede n'otres llingües xermániques, los verbos noruegos pueden ser o bien fuertes o bien débiles.

Los pronomes personales en noruegu declínense en casos: nominativu/acusativu. Dellos dialeutos caltuvieron el casu dativu en sustantivos y tamién cunten con un casu dativu, en llugar d'acusativu, nos pronomes personales, ente qu'otros dialeutos tienen l'acusativu nos pronomes y el dativu nos sustantivos, lo qu'apurre a estos dialeutos trés casos distintos.

Na gramática de noruegu más detallada qu'esiste, la Norsk referansegrammatikk, la categorización de los pronomes personales según persona, xéneru y númberu nun se considera flexón. Como asocede colos sustantivos, los axetivos tienen de #concordar en xéneru y númberu colos sos argumentos pronominales.

Otros pronomes nun tienen flexón. Los llamaos pronomes posesivos, demostrativos y relativos nun se siguen considerando pronomes. Los pronomes conformen una clase zarrada, lo que significa que de normal non se pueden añader nuevos elementos a esta clase.

El bokmål tien dos series de pronomes de 3ª persona: «han» y «hun», que faen referencia a individuos masculinos y femeninos respeutivamente, y «dean» y «det», que faen referencia a sustantivos inanimaos o impersonales, de xéneru masculín/femenín o neutru respeutivamente. Sicasí, en nynorsk y na mayoría de los dialeutos usa la mesma serie de pronomes («han» (m.), «ho» (f.) y «det» (n.)) pa referencies tanto personales como impersonales. «Det» tien tamién usos espletivos y catafóricos como asocede n'inglés, por casu en it rains y it was known by everyone (that) he had travelled the world.

La mayor parte del vocabulariu modernu del noruegu remóntase al nórdicu antiguu. La fonte más importante de préstamos ye'l baxo-alemán mediu, que tuvo una enorme influencia nel repertoriu léxicu del noruegu dende la Baxa Edá Media d'equí p'arriba y qu'inclusive influyó nes estructures gramaticales, como les construcciones de xenitivu. Anguaño, la mayor fonte de préstamos ye l'inglés, como por casu: rapper, e-mail, catering, juice o bag (orixinariamente una pallabra del nórdicu antiguu tomada como préstamu n'inglés).

Dellos préstamos camuden la so ortografía pa reflexar les normes de pronunciación del noruegu, pero, polo xeneral, la versión norueguizada de diches pallabres tiende a precisar munchu tiempu pa ser asimilada. Por casu, sjåfør (del francés chauffeur, xofer) y revansj (del francés revanche, revancha) son anguaño les formes más comunes, pero juice utilízase más que jus, catering más que keitering, service más que sørvis, etc.

• Bokmål
• Nynorsk
• Riksmål
• Høgnorsk
• Landsmål
• Standard østnorsk
• Russenorsk, una llingua pidgin que combina rusu y el noruegu.

• Einar Haugen, autor de la edición (1965, 1967, 1974). Norwegian-English Dictionary. Madison: The University of Wisconsin Press.

• Ethnologue report for Norwegian
• Norway: Small country with two written languages artículu escritu pol Ministru d'Asuntos Esteriores noruegu (Noruega: pequeñu país con dos llinguaxes escritos).
• Diccionariu inglés-noruegu noruegu-inglés
• Diferencies entebokmål y