Sylvia Michel

D Sylvia Michel (* 25. Dezember 1935) isch e Schwiizer Pfarrerin. Vo 1980 bis 1986 isch si Chileratspräsidenti vo de Reformierte Landeschile vom Kanton Aargau gsi. Dodermit isch si di erschti Frau z Europa gsi, wo e Leitigsfunktion in ere Chile gha het.

Site m Johr 1964 isch d Sylvia Michel Pfarrerin vo de Chilegmeind Ammerswil gsi (bis 1981). Si isch di erschti Frau im Aargau gsi, wo ellei es Pfarramt gleitet het. Vo 1971 bis 1974 het si als Präsidenti vo de Frauenzentrale Aargau gschaffet un 1974 het si d Synode i de Chilerat gwählt. Au do isch si di erscht Frau gsi. Im Johr 1980 isch d Sylvia Michel dann Chileratspräsidenti worde und ab 1985 im Vorstand vom Schwiizerische Evangelische Chilebund (SEK) gsi. Im 1986 het si für d Präsidium vom SEK kandidiirt, het d Kampfwahl gäge de Zürcher Heinrich Rusterholz aber verlore. En Grund defür isch ihrs Engagement gäge d Apartheid z Südafrika gsi, wo si vili Schtimme im bürgerliche Lager koscht het.^[1] Au im 1986 het si dann s Chileratspräsidium ufghä un het sich im internationale Kontekscht engagiert, zum Bischpil vo 1987 bis 1995 i de Kommission Diakoni z Europa vom Ökumenische Rat vo de Chile. Hüt läbt d Sylvia Michel z Mönchaltorf.

• Claudia Bandixen, Silvia Pfeiffer, Frank Worbs (Hrsg.): Wenn Frauen Kirche leiten. Neuer Trend in den reformierten Kirchen der Schweiz, Zürich 2006, ISBN 3-290-17418-2

1. ↑ Drei Pfarrer kämpfen um das Präsidium des Kirchenbunds Tagi vom 21. April 2010

Dä Artikel basiert uff ere fräie Übersetzig vum Artikel „Sylvia_Michel“ vu de dütsche Wikipedia. E Liste vu de Autore un Versione isch do z finde.