Seracher Dichterkreis

Als Seracher Dichderkreis bezoichnet mr a Vorsammlong vo ibrwigend schwäbische Dichter, wo a Zeitlang emmer môl wiider em Schlessle vo dr Ortschaft Serach (heitzodag a Stadtdoil vo Esslenga am Necker) zammakomma send.

D Mitglieder vom Seracher Dichterkreis send hauptsächlich de folgende schwäbische Schbätromandiker gwäa: dr Graf Alexander von Württemberg, sozusaga dr Kopf vo sellra Grubbe, dr Weinsberger Justinus Kerner, wo als Oberhaupt vo dr Schwäbischa Dichderschuel gilt, dr Stuegerder Gustav Schwab, dr Diibenger Ludwig Uhland ond dr Reitlenger Hermann Kurz. Der Personakreis ischt also zo-ma graußa Doil idendisch mit dr Schwäbischa Dichderschuel. Drom kô-mr da Seeracher Kreis en gewisser Weis au als a Zweigstell vo da sellem bezoichna. Schbäder hôt sich au noh dr Nikolaus Lenau ôôgschlossa, wo aber koi Schwôb gwäa ischt ond liderarisch au et als Romandiker gildet.^[1]

Em Jôhr 1828 hôt dr Graf Alexander von Württemberg em Oberamtsrichder Georgii sei Villa en Serach abkauft ond zo-ma scheena kloina Schlessle ausbaua lassa. Weil sich der Môô e-ma graußa Maß dr Dichtkonscht vorbonda gfihlt hôt, send oft dia oba erwehnde Manna Gäscht en sellem Schlessle gwäa. Bei ihre Zammakinft hend-se an rega Gedanka-Ausdausch pfleagt ond sich gegaseidich ihre neieschde Werk vorgleasa, om zo heera, was de andre dorzua moinet.^[2]

• Katharina Hild, Nikola Hild: Schlösser in der Region Stuttgart, Kabidl Schlösschen Serach uff de Seida 53 bis 55, Silberburg-Verlag, Diibenga, 1. Ufflag vo 2009, ISBN 978-3-87407-818-4
• Lueg d Weblink

• An Ausschnidd us-ma Flyer vo dr Stadt Esslenga, wo au vom Seracher Dichterkreis d Rede ischt ond wo a Bildle vom Schlessle Serach zeigt.

1. ↑ Des Bildle oba rechts zeigt dia Dichder et em Hof vo Serach, sondern em Garda vom Kerner seim Haus z Weinsberg. Dui Schlussfolgerong kô mr dô draus ziaga, dass em Kerner sei Frau dia Manna bewirdet! Dr Personakreis vo de Seracher ischt jô ohnehin weitgehend idendisch mit dr Schwäbischa Dichderschuel.
2. ↑ An dera Stell sei noh druff nôhgwiisa, dass sich des Seracher Schlessle heitzodag emma Privadbesitz befendet ond et besichdigt werra kô. Des gilt sowohl fir enna wia au fir ussa!