Rolf Zinkernagel

Dr Rolf Martin Zinkernagel (* 6. Januar 1944 z Rieche, Basel-Stadt) isch e Schwizer Mediziner und experimentelle Immunoloog. Er isch Nobelbriisdreeger für Mediziin (1996).

Dr Zinkernagel het vo 1962 bis 1968 Mediziin studiert und 1970 an dr Uni Baasel mit eme Thema zur klinischen Nöirologii bromowiert. Er isch Mitgliid vo dr Zofingia. Vom Oktober 1970 bis 1973 het er as wüsseschaftlige Assistänt am Instidut für Biochemii vo dr Uni Losann gschafft. 1975 het er dr Doktertitel (Ph. D.) an dr Australian National University z Canberra überchoo und dört au habilitiert. Vo 1976 bis 1979 isch er Brofässer am Scripps Research Institute gsii, denn isch er an d Uni Züüri gange und bis 1992 bliibe. Spööter het er am Instidut für experimentelli Immunologii vom Universidäätsspiddaal Züüri gschafft. Im Februar 2008 isch dr Rolf Zinkernagel in d Bangsioon gange.^[1]

Zsämme mit em Australier Peter Doherty het er 1973 entdeckt, wie s Immunsüsteem Zälle, wo mit Wiirus infiziert si, erkennt: Zälle, wo vo Wiirus befalle si, wärde vom Immuunsüsteem vo Killer-T-Zälle erkennt und vernichdet. Zämme mit em Doherty het er bi dr Undersuechig vo Müüs, wo mit Meningitis-Wiirene infiziert gsi si, entdeckt, ass d Killer T-Zälle für d Erkennig vo Zälle, wo vo Wiirus befalle si, nit nume e Wiirus-Antigeen bruuche, sondern au d Hauptgwääbverdräägligkäitskomplex (Major Histocompatibility Complex (MHC)), wo mä von ene vorhäär gwüsst het, dass si bim Abstoosse vo Gwääb bi Dransplantazioone e Rolle spiile. Iiri Rolle in dr Immuunabweer gege Wiire isch as en Überraschig choo. Für die Entdeckig häi dr Zinkernagel und dr Doherty 1996 dr Nobelbriis für Mediziin überchoo.

Dr Zinkernagel isch dr 24. Schwizer Nobelbriisdreeger.

Scho 1981 het er dr Cloëtta-Briis überchoo, 1983 dr Paul-Ehrlich-und-Ludwig-Darmstaedter-Briis, 1986 dr Gairdner Foundation International Award, 1987 dr William B. Coley Award, 1988 dr Otto Naegeli-Briis und 1995 dr Albert Lasker Award for Basic Medical Research. Sit 1994 isch er Mitgliid vo dr Dütschen Akademii vo de Naturforscher Leopoldina (sit 2008 die Nazonaali Akademii vo de Wüsseschafte). 1989 isch er as ordentligs Mitgliid in d Academia Europaea ufgnoo worde.^[2] 1996 isch dr Zinkernagel in d National Academy of Sciences, 1998 in d American Academy of Arts and Sciences und 2001 in d American Philosophical Society^[3] gweelt worde.

• Gisela Baumgart: Zinkernagel, Rolf. In: Enzyklopädie Medizingeschichte. Uusegee vom Werner E. Gerabek, Bernhard D. Haage, Gundolf Keil und Wolfgang Wegner, Walter de Gruyter, Berlin und Nöi York 2005, S. 1530
• Rolf Zinkernagel: Viruses and Virus Like Agents in Disease. Baasel 1993.

 Commons: Rolf Zinkernagel – Sammlig vo Multimediadateie

• Informatione vu dr Nobelstiftig zue dr Pryysverleihig 1996 an Rolf M. Zinkernagel (änglisch)
  • Rolf Zinkernagel: Autobiografii

1. ↑ http://www.uzh.ch/news/articles/2008/2843.html
2. ↑ Mitgliederverzeichnis: Rolf Zinkernagel. Academia Europaea, abgruefen am 16. August 2017 (englisch). 
3. ↑ Member History: Rolf M. Zinkernagel. American Philosophical Society, abgruefen am 12. Dezember 2018. 

Dä Artikel basiert uff ere fräie Übersetzig vum Artikel „Rolf_Zinkernagel“ vu de dütsche Wikipedia. E Liste vu de Autore un Versione isch do z finde.