Lucius Tarquinius Superbus

De Lucius Tarquinius Superbus isch de sibet und letscht König vo Rom (534-507) gsii. Weg sim Stolz und Hochmuet het er de Öbername Superbus »Stolze« öbercho. Er ghört zu de etruskische Famili vo de Tarquinier.

De Lucius Tarquinius Superbus isch de Soo vo de Tanaquil und em König Lucius Tarquinius Priscus gsii. Zäme mit de Tullia, enere Töchter vom König Servius Tullius, het er ai Töchter gha, d Tarquinia, woner mit em Först vo Tusculum verhürootet het, und drai Söö, won er i anderne Städt as König iigsetzt het.

De Lucius Tarquinius Superbus isch e grausame Herrscher gsii. Scho bivor er König woren isch, het er sini Frau Tullia di Jüngeri ermordet, demit er sini Schwögeri Tullia di Älteri hurööte cha. Drufabe het er sin Schwigervatter, de König Servius Tullius öffetlich ermordet, und d Königsmacht vo Rom a sich grisse. As König het er Prachtbaute errichte loo.

Nochdem sii Soo, de Sextus Tarquinius, d Lucretia vergwaltigt het, isches zu Uufständ choo und d Tarquinier sind us Rom vertribe wore. De Neff vom Lucius Tarquinius Superbus, de Lucius Iunius Brutus, und de Lucius Tarquinius Collatinus, de Maa vo de Lucretia, sind as ersti Konsul vo de noie Republik Rom iigsetzt wore.

D Söö vom Lucius Tarquinius Superbus hend versuecht d Macht zruggzgwüne und hend sich mitem etruskische König Porsenna verbündet. Dör d List vom aihändige Mucius Scaevola und em Muet vom aioigige Horatius Cocles isch es de Römer glunge, de Porsenna z bisiige und d Tarquinier endgültig z vertriibe.