Zum Inhalt springen

Karin Keller-Sutter

Us der alemannische Wikipedia, der freie Dialäkt-Enzyklopedy
d Karin Keller-Sutter (2024)

D Karin Keller-Sutter (* 22. Dezember 1963 as Karin Maria Sutter z Nideruzwil; haimetberächtigt z Jonschwil und Cherchbärg)[1] isch e Schwizer Politikeri (FDP) und isch am 5. Dezember 2018 in de Bundesrot gwählt worde.

Läbe

[ändere | Quälltäxt bearbeite]

D Karin Keller-Sutter isch z Wil im Kanton Sanggale zäme mit drü Brüedere im e ländliche, katholische Milieu ufgwachse. Si hät eri Schueljohr z Wil und z Neueburg absolviert. Dänn hät si sich a de Dolmetscherschuel z Zöri (DOZ) zur Öbersetzeri und Komferänzdolmätscheri usbilde loo. Noch em Diplom hät si as sälbständegi Komferänzdolmätscheri gschaffet. Si hät Studie i Politikwüsseschaft z London und a de Universität z Montreal gmacht, es Nochdiplomstudium i Pädagogik a de Uni Friburg absolviert und isch as Bruefsmittelschuellehreri tätig gsii.

Eri politisch Karriere hät si vo 1992 bis 2000 as Gmaindröti vo Wil agfange; im 1997 hät si de Gmaindrot präsidiert. Vo 1996 bis 2000 isch si Mitglid vom Kantonsrot vom Kanton Sanggale gsii und zwösched 1997 und 2000 Presidänti vo de FDP vom Kanton Sanggale. Sit erer Wahl am 12. März 2000 bis Endi Mai 2012 isch si Sanggaller Regierigsröti gsii. Si isch em Sicherhaits- und Justizdepartemänt vorgstande und isch Presidänti vo de Schwizer Justiz- und Polizeidirektorekomferänz (KKJPD) gsii. Im Johr 2006/07 und 2011/12 isch si Presidänti vo de Kantonsregierig gsii. Si hät sich för s neue Asyl- und Ussländergsetz und en konsequente Vollzug im Kanton Sanggale engagiert und hät Integrazionsveriibarige mit Ussländer iigfüert. Si hät en bsondere Schutz för Opfer vo hüsliche Gwalt und en polizeiliche Jugeddienst iigfüert. Under ere isch d Polizeipresänz im öffentliche Ruum erhöht wore. Si isch zwor för eri herte Massnahme kritisiert wore, isch aber för eri Aalige dezidiert iigstande.[2]

Am 19. August 2010 hät si bekannt ge, as si för de Bundesrot kandidieri, wo wäg em Rücktritt vom Hans-Rudolf Merz frei woren isch. Bi de Bundesrotsersatzwahle 2010, wo am 22. September stattgfunde händ, isch si aber nöd gwählt wore.

Bi de Parlamäntswahle vom 23. Oktober 2011 isch d Karin Keller-Sutter im erste Wahlgang mit 64,56 Prozänt vo de Stimmen in Ständerot[3] und am 28. November 2017 aistimmig zur Presidänti vom Ständerot för s 2018 gwählt wore.[4] Sit 2018 isch si au Presidänti vo de EU-EFTA-Delegazion.[5]

Under anderem isch si Vizepresidänti vo de Sanggaller Stiftig för Internazionali Studie,[6] sit 2012 im Vorstand vom Detailhandels-Verband Swiss Retail Federation[7] (ab Juli 2013 Presidänti[8]), Verwaltigsröti i de Pensimo Fondsleitung AG[1] und sit Mai 2013 im Verwaltigsrot vo de Versicherigsgruppe Bâloise.[9] Vo 2012 bis 2016 isch si Mitglid im Verwaltigsrot vo de NZZ-Mediegruppe.[10][11]

Am 9. Oktober 2018 hät d Karin Keller-Sutter bekannt gee, as si nomol för de Bundesrot kandidieri. En Sitz im Bundesrot isch frei wore, wäg em Rücktritt vom Johann Schneider-Ammann, wo im 2010 a Stell vo ere i d Landesregierig gwählt woren isch.[12] Bi de Bundesrotswahle am 5. Dezember 2018 isch si zur Nachfolgeri vom Johann Schneider-Ammann gwählt worde und isch dadermit di 9. Frau überhaupt, wo i de Bundesrot gwählt worde isch.[13]

D Karin Keller-Sutter isch mit em Rächtsmediziner Morten Keller ghürote und läbt z Wil.

Uuszaichnige

[ändere | Quälltäxt bearbeite]
[ändere | Quälltäxt bearbeite]
 Commons: Karin Keller-Sutter – Sammlig vo Multimediadateie

Fuessnoote

[ändere | Quälltäxt bearbeite]
  1. ↑ 1,0 1,1 Karin Maria Keller-Sutter. In: Moneyhouse. Abgruefen am 13. April 2018
  2. ↑ Daniel Ryser, Andreas Fagetti: Karin Keller-Sutter: «Das wäre der Dschungel.» In: WOZ Die Wochenzeitung. 22. April 2010
  3. ↑ Ergebnisse der Ständeratswahlen vom 23. Oktober 2011 (Memento vom 25. Oktober 2011 im Internet Archive). In: Website vom Kanton Sanggale, abgruefen am 25. Oktober 2011
  4. ↑ De Buman und Keller-Sutter an der Spitze der eidgenössischen Räte. In: Neue Zürcher Zeitung. 27. November 2018
  5. ↑ Schweizer Exporte legen stark zu, auch in die EU. In: Website der FDP.DieLiberalen, 9. Februar 2018 (Mediemittailig)
  6. ↑ Board of Trustees (Memento vom 12. Mai 2013 im Internet Archive). International Students’ Committee; abgruefen am 5. Mai 2013
  7. ↑ Keller-Sutter engagiert sich bei Swiss Retail Federation. In: Tages-Anzeiger. 21. Juni 2012
  8. ↑ Simone Rau, Romeo Regenass: Überraschung bei Economiesuisse (Memento vom 28. Juni 2013 im Webarchiv archive.is). In: Tages-Anzeiger. 14. Juni 2013.
  9. ↑ Baloise/GV: Alle Traktanden verabschiedet – Karin Keller-Sutter neu im VR. In: finanzen.ch. 2. Mai 2013
  10. ↑ Karin Keller-Sutter in Verwaltungsrat der NZZ-Mediengruppe gewählt. In: Aargauer Zeitung. 15. April 2012
  11. ↑ Unterstützung für den NZZ-Kurs. In: Neue Zürcher Zeitung. 16. April 2016
  12. ↑ Karin Keller-Sutter kandidiert für den Bundesrat. In: Neue Zürcher Zeitung. 9. Oktober 2018
  13. ↑ Die Resultate auf einen Blick. D Bundesrotersatzwahl uf srf.ch vom 5. Dezember 2018


Vorgänger
Johann Schneider-Ammann 		Mitgliid im Schwizer Bundesrot
sit 2019 		Nochfolger
—
Dä Artikel basiert uff ere fräie Übersetzig vu dere Version vum Artikel „Karin_Keller-Sutter“ vu de dütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Karin_Keller-Sutter&oldid=1045428"