Internationali Kampagne fir d Abschaffig vu Atomwaffe

D International Kampagne fir d Abschaffig vu Atomwaffe (ICAN – International Campaign to Abolish Nuclear Weapons) isch en international Bindnis vu Nitregierisorganisatione, wu si fir d Abschaffig vu allne Atomwaffe dur e bindende velkerrächtlige Verdrag, e Atomwaffekunväntion, yysetzt.

Dr Hauptsitz, e chlai Biro fir e Hampfle Mitarbaiter, isch uf em Biet vu dr Gmai Le Grand-Saconnex am Stadtrand vu Gämf im Ekumenische Zäntrum, wu au dr Wältchilcherot sy Sitz het. Generalsekretäri isch d Schwedi Beatrice Fihn.

Am 6. Oktober 2017 isch dr ICAN dr Friidesnobelbryys zuegsproche wore fir „ihri Arbet, Ufmerksamkait uf di katastrofale humanitere Kunsequänze vu Atomwaffe z länken un fir ihri bahnbrächende Bemiejige um e verdragli Verbot vu sonige Waffe“.^[1][2]

D ICAN isch anne 2007 bi dr Kumferänz vum Atomwaffespeerverdrag z Wien vu dr IPPNW – Internationali Ärzt fir d Verhietig vum Atomchrieg un andere Organisationen ins Läbe gruefen un in zwelf Länder aagfange wore. Anne 2011 het d Kampagne 200 Mitglidsorganisationen in 60 Länder ghaa, 2017 sin s 468 Organisationen in 101 Länder gsii.^[3]

D ICAN will dr globale Effetligkait d Gfohr, wu 27.000 us em Chalte Chrieg verblibene Atomwaffe darstelle, ins Bewusstsyy riefe, d Abschaffig in di effetli Diskussion bringen un Druck uf Regierige uusiebe. Zue dr wytere Zyyl vu dr Kampagne ghert d Vernetzig vu Organisatione, wu wältwyt fir d Abschaffig vu Atomwaffe schaffe. D ICAN schafft uf e megli braiti Basis vu Partner zues, vu Gwärkschaften iber religiesi un humaniteri Inschtitutione bis zue Umwältschutzorganisatione.

D ICAN het in dr letschte Johr mit e Hufe Kampagne fir d Unterstitzig vun eme Verdrag zum velkerrächtlige Verbot vu Atomwaffe gworbe. Im Juli 2017 hän 122 Staate vu dr Verainte Natione fir e sonige Verdrag gstimmt. Di bishär bekannte Atommächt un di maischte NATO-Staate sin nit derby gsii bi dr Verhandlige.^[2] Au Dytschland as Mitglid vu dr nukleare Dailhab hän nit an dr Verhandlige dailgnuul, was vu ICAN Dytschland kritisiert woren isch.^[5][6] Syt em 20. Septämber 2017 lyt dr Verdrag zur Unterschrift uus. Är dritt in Chraft, sobald er vu 50 Staate ratifiziert woren isch.^[2]

Zue dr prominänte Unterstitzer vu dr Kampagne ghere dr Dalai Lama, dr ehmolig Generalsekretär vu dr Verainte Natione Ban Ki-moon,^[7] d Fridesnobelbryysdreeger Desmond Tutu^[8] un Jody Williams un dr Jazzpianischt Herbie Hancock.^[9]

• Internationali Websyte vu dr Kampagne ICAN
• Websyte vu ICAN Dytschland
• Websyte vu ICAN Schwyz
• Websyte vu ICAN Eschtrych

1. ↑ Hohe Auszeichnung – Der Friedensnobelpreis geht an die Anti-Atomwaffen-Kampagne, srf.ch, 6. Oktober 2017.
2. ↑ ^{2,0 2,1 2,2} Gegen die Logik einer atomaren Ordnung. uf: süddeutsche.de, 6. Oktober 2017. Abgruefen am 6. Oktober 2017.
3. ↑ icanw.org: Partner organizations
4. ↑ ^{4,0 4,1} http://www.icanw.org/pledge/
5. ↑ Atomwaffenverbot: Wann, wenn nicht jetzt? uf: Zeit Online, 15. Juni 2017. Abgruefen am 6. Oktober 2017.
6. ↑ UN-Verhandlungen: Deutschland drückt sich vor einem Atomwaffenverbot. uf: tagesspiegel.de, 15. Juni 2017. Abgruefen am 6. Oktober 2017.
7. ↑ UN Secretary-General’s message for Nuclear Abolition Day (June 5) (Em Ban Ki-Moon sy Video-Grueßbotschaft zum ICAN Nuclear Abolition Day). (Video) Internationali Kampagne fir d Abschaffig vu Atomwaffe, 3. Juni 2010, abgruefen am 6. Oktober 2017 (änglisch). 
8. ↑ Desmond Tutu: Ending Nuclear Evil. Project Syndicate, 29. Juni 2011, abgruefen am 6. Oktober 2017 (änglisch). 
9. ↑ Campaign overview (Iberblick vu dr Kampagne). Internationali Kampagne fir d Abschaffig vu Atomwaffe, archiviert vom Original am 28. September 2012; abgruefen am 6. Oktober 2017 (änglisch). 

Dä Artikel basiert uff ere fräie Übersetzig vu dere Version vum Artikel „Internationale_Kampagne_zur_Abschaffung_von_Atomwaffen“ vu de dütsche Wikipedia. E Liste vu de Autore un Versione isch do z finde.