Uhurupark
Uhurupark is ’n ontspanningspark van 12,9 hektaar langsaan die sentrale sakekern in Nairobi, Kenia. Wyle Mzee Jomo Kenyatta het dit op 23 Mei 1969 vir die publiek geopen. Die park bevat ’n mensgemaakte meer, talle nasionale gedenktekens en ’n vergaderplek wat ’n gewilde bymekaarkomplek vir skaatsplankryers oor naweke geword het. Hierdie vergaderplek word ook soms vir politieke en godsdienstige byeenkomste gebruik. Dit het berug geword as die plek waar die regime van pres. Daniel arap Moi betogings teen onwettige grondroof gewelddadig uitmekaargedryf het.
In 1989 het Wangari Maathai en talle van haar volgelinge ’n betoging in Uhurupark gehou om die oprigting van die Kenya Times Media Trust-sakekompleks van 60 verdiepings te probeer keer. Die regering het haar gedwing om haar kantoor te ontruim en sy is sleggesê in die parlement, maar haar betogings en die regering se reaksie net daartoe gelei dat buitelandse beleggers die projek gekanselleer het.
In Augustus 1996 het ’n groep onder leiding van ’n Katolieke kardinaal en aartsbiskop Maurice Michael Otunga ’n stapel kondome in die park verbrand. Sowat 14 jaar later was die park weer in die nuus toe ’n bom in Junie 2010 daar ontplof en ses mense gedood het terwyl meer as 100 beseer is. Die aanval was gemik op ’n “Nee”-veldtogsaamtrek vir die naderende grondwetlike referendum.
Galery
[wysig | wysig bron]-
Die Nasionale Monument. -
Nyayo-gedenkteken. -
Nairobi se stadsprofiel vanaf die park gesien. -
Saamtrek van die Orange Democratic Movement tydens die presidentverkiesing van 2007. -
Die mensgemaakte meer. -
Fontein.
