Pakhuispas

Pakhuispas
Pakhuispas Ligging van die Pakhuispas in die Wes-Kaap
Koördinate: 32°8′0″S 19°2′1″O / 32.13333°S 19.03361°O / -32.13333; 19.03361
Ligging	Tussen Clanwilliam en Calvinia
Maksimumhelling	1:9
Hoogte	905 m
Lengte	25 km
Oppervlak	Teer
Ingenieur	Thomas Bain
Voltooi in	1877
In	Sederberg
Pad	R364

Die Pakhuispas is 'n bergpas in die Wes-Kaap, Suid-Afrika. Die pas dra die R364-streeksroete oor die Pakhuisberge, die noordelike uitlopers van die Sederberg en verbind Clanwilliam met Calvinia. 'n Suidoostelike afdraaipad lei na die Biedouwvallei en Wupperthal. Die pas is 25 km lank, bereik 'n hoogte van 905 m bo seespieël en is met 'n helling van 1:9 besonder steil.

Die pas is deur Thomas Bain gebou. Dit het hom drie jaar geneem om die pas te voltooi en die pas is in 1877 geopen. In die 1960's is verbeteringe vir die eerste keer aangebring; 'n bewys van Thomas Bain se vakmanskap.

Die pas is gedurende 2009 in sy geheel geteer.

Gedurende die konstruksietyd het Thomas Bain verskeie belangrike rotstekeninge van die San in die omgewing ontdek. Sowat 15 km vanaf Clanwilliam gaan die pad verby die graf van C Louis Leipoldt, die bekende Suid-Afrikaanse digter. Daar is ook verskeie staproetes in die omgewing.^[1][2]

Gedurende Desember 1946 het 'n Junkers Ju 86 vliegtuig (Vlug SAAF 647) van die Suid-Afrikaanse Lugmag in die 1 077 m hoë Pakhuispiek vasgevlieg. Almal aan boord het gesterf. Die vliegtuig was op pad van Pretoria na Kaapstad met 'n vrag laaghout aan boord, en dit was op die betrokke dag mistig in die omgewing.^[3]

• Lys van bergpasse in Suid-Afrika

• Standard Encyclopaedia of Southern Africa, deel 8. Kaapstad: Nasou, 1973. ISBN 0-625-00324-1