Giacomo Puccini

Giacomo Puccini
Giacomo Puccini
Agtergrondinligting
Geboortenaam	Giacomo Antonio Domenico Michele Secondo Maria Puccini
Gebore	22 Desember 1858 Lucca
Sterf	29 November 1924 Brussel
Genres	Romantiek, Verismo
Beroep(e)	Komponis

Giacomo Antonio Domenico Michele Secondo Maria Puccini (22 Desember 1858 – 29 November 1924) was 'n Italiaanse komponis van hoofsaaklik operamusiek.

Die Italiaanse operakomponis se musikale styl word gekenmerk deur meesleurende melodieë en briljante orkestrasie wat ryk aan atmosfeer is en 'n sterk Impressionistiese inslag het. Giacomo Antonio Domenico Michele Secondo Maria Puccini is op 22 Desember 1858 in Lucca gebore.

Hy het uit 'n musikale familie gekom, en sy vader, oupa en oupagrootjie het almal kerkmusiek gekomponeer. Die jong Puccini was koorknaap en later orrelis, en sy eerste komposisies was orrelimprovisasies. Op 18-jarige leeftyd het hy na 'n opvoering van Verdi se Aïda besluit om operakomponis te word. In 1880 het hy onder Bazzini en Ponchielli aan die konservatorium in Milaan gestudeer, waar hy sy opleiding voltooi het met 'n orkeswerk Capriccio sinfonico (1883).

In 1884 is Puccini se eerste opera, Le villi, in Milaan opgevoer met die steun van 'n groep vriende onder leiding van die teksskrywer en komponis Arrigo Boito (1842- 1918). Die opera het die aandag getrek van die musiekuitgewer Giulio Ricordi (1840-1912), wat later Puccini se groot vriend en raadgewer sou word.

Toe Puccini se tweede opera, Edgar, in 1904 in La Scala in Milaan misluk het, het Ricordi hom na Bayreuth in Duitsland gestuur sodat hy na Wagner se Die Meistersinger von Nürnberg kon gaan luister. Die opvoering van Puccini se Manon Lescaut (1893) was die begin van 'n reeks operameesterstukke. Die teksskrywers was Giuseppe Giacosa (1847- 1906) en Luigi Illica (1857- 1919), 2 manne wat ook die tekste van La Bohème (1896), Tosca (1900) en Madama Butterfly (1904) gelewer het. La Fanciulla del West ("Die meisie van die Weste"; 1910) toon 'n sterk Impressionistiese invloed.

Die première in New York is gelei deur Arturo Toscanini (1867-1957) en was 'n triomf. Sommige van sy melodieë het hulle lank reeds in die populêre kultuur gevestig, waaronder "Nessun dorma" uit Turandot, "E lucevan le stelle" uit Tosca en "O mio babbino caro" uit Gianni Schicchi. Anderhalf eeu nadat dit geskryf is, oorheers sy meesterwerke steeds die standaardrepertorium.

Hierna het Puccini 'n soort operette, La Rondine (1917), en 3 eenakters, II Tabarro ("Die Mantel"), Suor Angelica en Gianni Schicchi, onder die titel II Trittico ("Drieluik") gekomponeer.

Voordat hy sy laaste opera, Turandot, kon voltooi, is hy op 29 November 1924 na 'n keeloperasie in Brussel oorlede. Hy was een van die invloedrykste komponiste van die 19de en 20ste eeue. Sy werk word vandag nog gereeld in operahuise wêreldwyd opgevoer.

Puccini se vernaamste operas en die datum waarop dit die eerste keer opgevoer is:

• Le Villi, 31 Mei 1884
• Edgar, 21 April 1889
• Manon Lescaut, 1 Februarie 1893
• La bohème, 1 Februarie 1896
• Tosca, 14 Januarie 1900
• Madama Butterfly, 17 Februarie 1904
• La fanciula del West, 10 Desember 1910
• La rondine, 27 Maart 1917
• Il tabarro, 14 Desember 1918
• Suor Angelica, 14 Desember 1918
• Gianni Schicchi, 14 Desember 1918
• Turandot, 25 April 1926

• Wikimedia Commons het meer media in die kategorie Giacomo Puccini.

• Wêreldspektrum, 1982, ISBN 0908409648, volume 23, bl. 134