Dave Benton

Dave Benton

Pais di nashonalidat	Estonia
Nòmber den idioma propio	Dave Benton
Nòmber di dilanti	Dave
Fam	Benton
Fecha di nasementu	31 yanüari 1951
Lugá di nasementu	Aruba
Okupashon	musiko, kantante
Periodo activo (inicio)	1970
Partisipante na	Eurovision Song Contest 2001
Instrumento	instrumento di perkushon, bos
Lugá di formashon	Aruba
Género	pop music

Dave Benton, nomber artistico di Efren Eugene Benita (☆ 31 di januari 1951 na Aruba), ta un cantante Arubiano-Estoniano. E tabata ganado di e Festival di Canto Eurovision 2001 y hunto cu Tanel Padar a representa Estonia. Na 2001 e tabata e prome cantante di color y esun mas bieu pa gana e festival.^[1]

Efren Benita a nace na Aruba como yiu di Juancho Benita y Petronilia Benita-Croes. E tin seis ruman. Den decada 1970 el a participa como cantante na Festival di Tumba, Festival Voz di Oro y OTI Festival Aruba. E tabata compone su propio canticanan y tambe pa otro cantante. Rond 1979 e ta bandona Aruba pa explora un carera musical na Merca. Aki e tabata presenta den shownan na hotel grandi y tabata traha como baterista y corista pa The Drifters, Tom Jones, Billy Ocean, José Feliciano y The Platters. Despues di a gana e OTI Festival di Antias Hulandes na 1981 el a representa e islanan na Festival OTI na Ciudad di Mexico cu su composicion Vaya un amigo, terminando riba posicion 20. E ta wordo premia como Cantante di Aña 1982 dor di e revista Arubano "Amistad".^[2] Den decada 1970 y 1980 Benita a graba tres album, di cua dos na Papiamento. Su shownan en duo cu Sharon Rose tabata gosa di hopi popularidad.

Desde 1985 e tabata residencia na Hulanda, for di unda el a continua su carera musical trahando den diferente pais Europeo. Na 1988 e ta participa na e concurso hulandes, Vara Songfestival y ta logra pa pasa pa e final como un di e seis finalista.^[3] Den añanan nobenta el a canta den un musical aleman "City Light", cual a estrena na 1994 na Berlin. Den e musical el a presenta pa prome bes bou di e nomber artistico, Dave Benton, un nomber cu su producer a inventa. Mas despues el a remplasa Engelbert Humperdinck seis biaha durante su tour na Australia.

Benton a muda na 1997 pa Estonia, pais natal di su esposa cu el a conoce na 1996 abordo di un crucero. Den e region nort di Europa, specialmente den e estadonan Baltico: Estonia, Letonia i Lituania el a consecha exito como cantante y musico. Tambe el a produci varios album y a duna presentacionnan cu su banda La'ment. Den e Festival di Canto di Eurovision 2001 na Copenhagen el a representa Estonia hunto cu e cantante rock Tanel Padar y e boyband 2XL, saliendo ganador cu e cantica Everybody. E tabata e prome y te 2023 e unico biaha cu Estonia a gana e festival aki.

Dave Benton ta residencia na Estonia; e ta casa y ta tata di tres yiu muhe. Su yiu muhe Sissi Nylia Benita tambe ta cantante, conoci como Guerilla. Na 2018 el a sali na di dos luga den e programa di television "Estonia ta busca superstrea" y na 2021 na di dos luga den e Festival di Canto di Estonia.

• 2001: From Monday to Sunday
• 2001: Love & Music through the years
• 2005: Humanity through harmony
• 2006: Generations
• 2013: Christmas with Love

• 1981: Soy Aruba
• 2001: Everybody, cu Tanel Padar
• 2001: Más que un millón

• Pagina di Dave Benton riba IMDb
• Profiel di Dave Benton riba Discogs
• Vídeo di e presentacion di Tanel Padar y Dave Benton den e Festival di Eurovisión 2001 cu e tema Everybody

Mira tambe e kategoria Dave Benton di Wikimedia Commons pa mas dato mediatiko tokante di e tema aki.