Batalha de Khalkhin Gol
La batalha de Khalkhin Gol foguèt una batalha frontaliera entre Japon e l'URSS, sostenguda per Mongolia, que se debanèt dau 11 de mai au 16 de setembre de 1939. Simpla escaramocha entre tropas cargadas de susvelhar la frontiera, la batalha se transformèt a cha pauc en guèrra non declarada. Durant lei periòdes de combat pus intens, opausèt 57 000 soudats sovietics, 500 carris e veïculs blindats e 809 avions a 30 000 soudats japonés, 135 carris e veïculs blidats e 250 avions. S'acabèt per una vicòria sovietica qu'aguèt de consequéncias importantas sus lo debanament de la Segonda Guèrra Mondiala car Japon refusèt per la seguida d'atacar tornarmai lo territòri sovietic dins lo corrent de la guèrra e s'orientèt en plaça vèrs una expansion en direccion deis illas de l'Ocean Pacific e dau Sud-Èst d'Asia.
Lo debanament de la batalha es devesit entre tres fasas diferentas. En mai, una premiera ataca japonesa entraïnèt un afrontament entre de fòrças limitadas e s'acabèt per una premiera revirada. En julhet, una segonda ofensiva s'acabèt per una revirada novèla. Enfin, en aost, lei Sovietics organizèron una ofensiva massiva que li permetèron de reconquistar tota la zòna contestada gràcias ai dificultats japonesas regardant la dificultat d'avitalhar lo frònt e d'i mandar de mejans sufisents. Lei Japonés perdiguèron oficialament 8 440 tuats e 8 766 bleçats e lei Sovietics 9 284 tuats e bleçats. Pasmens, a la fin dau sègle XX, d'estudis deis archius d'epòca indiquèron de bilanç pus importants : aperaquí 45 000 tuats ò bleçats per lei Japonés e entre 23 000 e 26 000 tuats ò bleçats per lei Sovietics. Dins lo camp sovietic, la batalha permetèt tanben au generau Gueorgui Júkov — qu'aguèt un ròtle decisiu còntra leis Alemands entre 1941 e 1945 — de se destriar au sen de l'armada sovietica.
-
Soudats japonés passant lo riu Khalkhin Gol. -
Carris sovietics passant lo riu Khalkhin Gol. -
Carri japonés Tipe 95 Ha-Go capturat per lei Sovietics. -
-
Soudats japonés capturats. -
