Alabast

Alabast er eit mineral. Det er ein finkorna tett, gjennomskinleg kvit eller marmorert type gips (kalsiumsulfat, CaSO₄ · 2 H₂O). Alabast er mykje nytta i prydsaker, relieff, skulpturar, armatur og anna, då mineralet er lett å skjere til. Det kan nyttast til lampeskjermar i staden for matta glas, då det er nokso gjennomskinleg. Kan ikkje nyttast utandørs, då vatn løyser opp mineralet. Førekomstar finst mellom anna i Storbritannia, i Italia og ved Isfjorden på Svalbard.

Elles vert ogso ein varietet av kalkspat (det vil seie kalsitt, jamfør kalsiumkarbonat) kalla alabast. Dette er det mineralet som ber dette namnet i Bibelen og andre kjelder frå antikken. Ordet har kome til dei moderne europeiske språka frå Latin alabaster, som hadde det frå gresk αλάβαστρος (alabastros), 'alabast', eller αλάβαστος (alabastos), 'vase av alabast'.^[1] Det er uvisst kva språk gresk har fått ordet frå, kanskje frå gamalegyptisk, då dette mineralet vart mykje utvunne i det gamle Egypt. Andre varietetar av mineralet finst elles til dømes i Algerie, USA og Mexico.

• 
  Italiensk bordlampe, heilt ut tilvirka av alabast, 13 cm i tverrmål
• 
  Bordlampe, detalj, marmorert

1. ↑ Alabastos, Henry George Liddell, Robert Scott, A Greek-English Lexicon, at Perseus

Denne artikkelen er ei spire. Du kan hjelpe Nynorsk Wikipedia gjennom å utvide han.