Massachusetts Institute of Technology

Dat Massachusetts Institute of Technology (MIT, plattdüütsch: Institut för Technologie Massachusetts) is en Technische Hoochschool un Universität in Cambridge, Massachusetts in den USA, grünnd 1861. Dat MIT gellt as en vun de weltwiet führen Eliteuniversitäten un reckt in' internatschonalen Vergliek regelmatig en Spitzenplatz.^[1] De Hoochschool is Liddmat vun de Association of American Universities, en siet 1900 bestahn Verbund vun führen forschungsintensiv noordamerikaansch Universitäten.

Dat MIT is en private, nicht-konfessionelle technische Universität, de as eerste Chemie-Ingenieure utbillen dee un de Wertschaps-, Sozial- un Geisteswetenschapen in de Ingenieurutbillen mit inbetrucken hett. To Tiet studeeren dor meest 11.000 Studenten. Dat MIT rühmt sück för dat hooch Niveau vun de Utbillen, wobi de Studenten all fröh in de Forschensaktivitäten inbunnen wurrn. 1.009 wetenschaplich Mitarbeiter gifft dat dor. Dat Motto vun de Universität luut: Mens et Manus (plattdüütsch: Geist un Hand).

De Hoochschool liggt an' Charles River in Cambridge, direkt gegenöver vun Boston un stroomafwärts vun de Harvard University.

Rund um dat MIT hett sück en Nett ut lütt Hoochtechnologie-firmen ansiedelt: In de laat 1990er Johren weer Risikokapital mehr as noog vörhannen, so dat de bevörtoogt Karrierewunsch vun völ Studenten dorin bestunn, en Hightech-Startup-Firma to grünnen.

De Hoochschool is todem Grünnensorganisatschoon un Seet vun dat World Wide Web Consortium (W3C), dat Standardiseerensgremium för dat World Wide Web.

Siet 2002 maakt dat MIT so nah un nah sien kumplette Kursünnerlagen över dat Internet apenlich togänglich un ünnerstütt dormit de OpenCourseWare. Alleen in dat MIT-OpenCourseWare-Projekt wurrn up disse Wies meest 2000 Kurse in 33 Facken verfügbar maakt.

Grünnd wurr dat MIT nah dat Vörbild vun düütsch- und franzööschsprakig polytechnisch Hoochscholen an' 10. April 1861 as dreegleedrig Inrichtung, bestahnd ut „a society of arts, a museum of arts [industrial arts], and a school of industrial science.“ De Grünner William Barton Rogers, en bekannt Natuurforscher, wull en unafhängige Universität schaffen, mit Utrichten up de Erfordernisse vun en tonehmen industrialiseert Amerika. Wegen den Börgerkrieg kunnen de eerst Studenten aber eerst 1865 upnommen wurrn. In de Folgejohren kreeg dat MIT en besünners gooden Roop.

Wegen de andüern Finanzeerenslööker wurr um 1900 en Tosommensluss mit de Harvard University plaant. Dor geev dat aber düchtig Proteste vun ehmalg MIT-Studenten un so wurr dor nix van. 1916 wurr de Campus vun Boston nah Cambridge an dat tegenöverliggen Stroomufer verleggt.

Nah den Tweeten Weltkrieg, in de dat MIT to de Entwicklung vun de Radartechnik bidroog, steeg dat Ansehn vun dat MIT wieder an. Dat Wettrüsten un de Ruumfohrt in de Tiet vun den Koll Krieg hemm för en staatlich fördert Nahfraag nah Hoochtechnologie sörgt. Bekannt wurr dat MIT ok dör den Digitalrekner Whirlwind, de dor vun 1944 bit 1952 ünner de Leiten vun Computerpionier Jay Wright Forrester entwickelt un baut wurr.

Anner Entwicklungen ut de MIT-Labors vun de Nahkriegstiet weern de Ferrit-Karnspieker as ok de automatisch Ruumsondenstüern vun dat Apollo-Programm. Siet dem dat Personal Computer gifft, hett dat MIT ok en zentraal Rull in de Slöteltechnologien vun dat Informatschoonstiedöller besett.

2001 hett MIT-Präsident Charles Marstiller Vest faststellt, dat dat MIT as Institutschoon de Karriere vun wieflich Fakultätsliddmaaten un Forschers in diskrimineeren Wies hinnert harr. He hett denn organisatorisch Träen to de Gliekstellung vun de Geslechter ankünnigt.

An' 6. Dezember 2004hett Susan Hockfield, en Wetenschaplerin up dat Rebeet vun de molekulare Neurobiochemie, nah 15 männlich Präsidenten as eerste Präsidentin dit Amt antreden. An' Juli 2012 is hör Leo Rafael Reif in't Amt nahfolgt.

An' 19. April 2013 geev dat för dat Stata Center vun den Campus en Scheeteree, bi de twee Minschen, dorünner en Polizist, to Dood keemen.^[2]

De Campus vun dat MIT liggt in Cambridge nich wiet weg vun de Harvard University direkt an' Charles River mit Blick up de Skyline vun Boston. An dat ööstlich Enn' grenzt he an de Longfellow Bridge, de nah Boston führen deiht.

Ut de Grünnerjohren vun dat MIT sünd de »Maclaurin Buildings« to nömmen, de den Ingangsberiek ton den Campus billen. Se wurrn vun Welles Bosworth in' neoklassizistischen Stil vun de Tiet entworfen. Fardigstellt wurrn se 1916. Kenntekent sünd de groottüügig Luchtführen un besünners de zentraal Kuppelbau.

De Friese dragen de Naams vun groot Natuurforscher, to'n Bispeel Aristoteles, Isaac Newton, Benjamin Franklin, Louis Pasteur, Antoine Lavoisier, Michael Faraday, Archimedes, Leonardo da Vinci, Charles Darwin un Nikolaus Kopernikus, jeweils umgeven vun Gruppen mit Naams vun passend Forscher, de to dat jeweilig Forschungsrebeet vun de „Grooten“ bidragen hemm.

Lavoisier to'n Bispeel befind sück in den Kreis vun Boyle, Cavendish, Priestley, Dalton, Gay-Lussac, Berzelius, Woehler, Liebig, Bunsen, Mendelejew, Perkin un van’t Hoff.

Latere Bauwarken ut de Johren 1950 bit 1970 hemm nich so de groot Utstrahlen, ok wenn eenige vun de vun den MIT-Absolventen I. M. Pei entworfen wurrn, so dat Green Building (Hööfthuus vun de Fakultät för Geo-, Atmosphären- un Planetenphysik), dat Institut för Chemische Verfohrenstechnik as hööchst Bauwark up den Campus un dat Wiesner Building, in dat dat MIT Media Lab ünnerbrocht is.

En umfangriek Bauprogramm in jüngste Tiet hett dat »Stata Center«, entworfen vun Frank Gehry, dat Simmons Hall Studentenwahnheim, entworfen vun Steven Holl, dat Zeisiger-Sportzentrum un en nee Bauwark, entworfen vun Charles Correa, för dat »Picower Center for Learning and Memory«, dat »Institute for Brain and Cognitive Science« un dat »McGovern Institute for Brain Research« umfaat.

För dat »Stata Center« muss 1998 en olt Bauwark wieken, dat in' Tweeten Weltkrieg as Provisorium upricht wurr. Eegentlich sull dat latestens söss Maand nah Kriegsenn afreeten wurrn, aber bleev denn trotz sien Hässlichkeit över Johren en Huus för kreativ Projekte.

To de nee’sten un architektonisch interessanten Bauwarken hörrn:

• Baker House, plaant vun Alvar Aalto
• Kresge Auditorium, plaant vun Eero Saarinen
• Wiesner Building, plaant vun I. M. Pei, mit den vun Kenneth Noland plaanten kachelten Butenberiek
• Stata Center, plaant vun Frank Gehry, fardigstellt 2004

Dat Lernpensum an’ MIT is in de ünnere Semester düchtig hooch. Aber liekers is de Quote vun spoodriek Kursafslüsse ok hooch. Dat verklort sück ut de antiautoritäre Kultur un den Paradigma, dat erwurben Weeten deelt wurrn moot. In de Praxis heet dat, dat öllere Studenten un Perfessers den jüngeren mit Hülp to Siet stahn.

Wiels dat Semester finnen regelmatig schriftlich Prüfungen statt. Konkret Weeten wurrd dor weniger affraagt as völmehr de Fähigkeit vun den Studenten prüüft, komplexe Probleme to lösen. So gifft dat meest kien Multiple Choice-Tests, de Arbeitsergevnisse sünd free to beschrieven. De Analyse un Korrektur vun disse Test is entsprekend mit mehr Upwand verbunnen.

Dat wurrn aber ok praktisch Upgaven to dat Lösen stellt. De Studenten kriegen en Konstruktschoonsupgaav stellt un versöken tegennanner an, dat best Ergevnis hentokriegen.

Neben den Swoorpunkt Natuurwetenschapen un Technik hett dat MIT ok Institute för Philosophie, Volkswertschap, Bedrievswertschap, Linguistik un Anthropologie.

• Architektur un Plaanung
• Geisteswetenschapen, Künste un Sozialwetenschapen
• Gesundheitswetenschapen un Technologie (Whitaker College of Health Sciences and Technology)
• Ingenieurwetenschapen
• Natuurwetenschapen
• Wertschapswetenschapen (ünner annern Alfred P. Sloan School of Management)

Ünner de bekanntst Forschensinstitute sünd to nömmen:

• Dat vun dat MIT mitgrünnd Auto-ID Center (1999–2003) wurr to dat weltwiet gröttst universitären Forschensnetwark för vernett RFID-Technologie, den Auto-ID Labs
• MIT Computer Science and Artificial Intelligence Laboratory
• Lab for Information and Decision Systems
• Lincoln Lab
• Research Lab of Electronics
• MIT Media Lab
• Radiation Laboratory at the Massachusetts Institute of Technology
• Whitehead-Institut för biomedizinische Forschung

Dat gifft eenige traditschonelle Kooperatschoonspartner:

• Dat Charles Draper Lab entwickelt ünner annern Raketentechnik för dat US-Militär. Dat hörrn fröher as Instrumentation Lab direkt to dat MIT, wurr aber wiels den Vietnamkrieg afspulten, um den Vietnamkriegsgegnern ünner de Studenten weniger Angriepsflach to beeden. Noch vör dat Utgleedern wurr hier de Apollo Guidance Computer entwickelt. Nömmt wurrn is dat hüdige Institut nah den Grünner vun dat Instrumentation Lab, Charles Stark Draper, de dat 1940 in’t Leven ropen hett.
• De Woods Hole Oceanographic Institution hett en gemeensam Studienprogramm mit dat MIT för fortschreeden Semester.
• Mit de benahbert Harvard-Universität is dat MIT dör en traditschonelle Rivalität verbunnen. Dat geev in de Anfangstieden vun beid Universitäten Plääns, de tosommentoleggen. Dor hemm sück denn aber de Studenten un Fakultätsliddmaaten gegen to Wehr sett, un so wurr dor nix vun.

Hüüd gifft dat afstimmt Studienplääns för ünnere Semester, so dat Studenten Kurse an dat MIT un an Harvard mitnanner kombineeren könnt. Dat Glieker gellt ok för Studentinnen an dat Wellesley College, en traditschoonsriek Hoochschool blots för wieflich Studenten.

• Mit de University of Southampton un de University of Cambridge in Grootbritannien gifft dat en Uttuuschprogramm.

Siet eenig Johren geiht dat MIT immer mehr Partnerschapen mit verscheeden Universitäten as ok apenlich un privat finanzeerten Forschungslabors in. De Projekte sünd in’ Allgemeenen vun den externen Partner to betallen un deenen dormit to, dat dat MIT to Geld kummt. Dat MIT as privatrechtlich Organisatschoon maakt up disse Wies sien Renommee un de Forschungskapazität vun de Fakultätsliddmaaten un Studenten to Geld.

De Universitätsverlag MIT Press is siet 1962 en vun de Universität unafhängig Ünnernehmen, dat för de Universität publizeert. De Verlag gifft ruch weg 200 Böker un 40 wetenschaplich jedes Jahr herut.^[3]

Vun de 10.206 Studenten sünd ungefähr 4000 „Undergraduates“ un 6000 „Graduates“. 43 % vun de Studentenschap sünd Fruen (29 % vun de Graduates). Dat gifft Studenten ut all 50 US-Bundsstaaten un ut 110 verscheeden Länner. 9 % vun de „Undergraduates“ un 40 % vun de „Graduates“ sünd Studenten ut dat Utland.

45 % vun de „Undergraduates“ (17 % vun de „Graduates“) hörrn en amerikaansch Minnerheit an:^[4]

• 26,5 % (11,5 %) Asiaatsch Amerikaner
• 11,3 % (2,9 %) Hispaanisch Amerikaner
• 5,8 % (1,9 %) Afroamerikaner
• 1,5 % (0,3 %) Amerikaansche Oorinwahner

Herkunft vun de internatschonalen Studenten (2006):^[5]

• Asien (China 309, Süüdkorea 247, Indien 222, Taiwan 88, Japan 82, Singapur 69, Thailand 53, Törkie 52, Pakistan 28, Hongkong 26, Indonesien 22, Malaysia 22, annern)
• Europa (Frankriek 90, Grekenland 54, Düütschland 48, Italien 47, Grootbritannien 41, Spanien 38, Russland 31, Bulgarien 23, Irland 20, annern)
• Latienamerika (Mexiko 55, Brasilien 33, Argentinien 24, Chile 23, annern)
• Noordamerika (Kanada 225)
• Naher un Middlerer Oosten (Israel 34, Iran 29, Libanon 21, annern)
• Afrika (Kenia 13, Ghana 11, Nigeria 9, Ägypten 8, Simbabwe 6, annern)
• Ozeanien (Australien 25, Neeseeland 5)

De Studiengebühren leegen 2013-2014 bi 43.210 US-$^[6]

De Sportteams vun dat MIT sünd de MIT Engineers. De Hoochschool is Liddmaat in de New England Women’s and Men’s Athletic Conference un nehmt dormit an de 3. Division vun de National College Athletic Association deel.

• George Arthur Akerlof, PhD 1966 – Wertschapswetenschapen 2001
• Sidney Altman, S. B. 1960 – Chemie 1989
• Kofi Annan, S. M. 1972 – Freedensnobelpries 2001
• Robert Aumann, PhD 1955 – Wertschapswetenschapen 2005
• Ben Shalom Bernanke, PhD 1979 – Wertschapswetenschapen 2022
• Elias James Corey Jr., S. B. 1948, PhD 1951 – Chemie 1990
• Eric Allin Cornell – Physik 2001
• Peter Arthur Diamond – Wertschapswetenschapen 2010
• Esther Caroline Duflo, PhD 1999 - Wertschapswetenschapen 2019
• Robert Fry Engle – Wertschapswetenschapen 2003
• Richard Phillips Feynman, S. B. 1939 – Physik 1965
• Andrew Zachary Fire – Medizin 2006
• Jerome Isaac Friedman - Physik 1990
• Leland Harrison Lee Hartwell, PhD 1964 – Medizin 2001
• Bengt Robert Holmström - Wertschapswetenschapen 2016
• Howard Robert Horvitz, SB 1968 – Medizin 2002
• Henry Way Kendall, S. B. 1948, PhD 1951 – Physik 1990
• Wolfgang Ketterle, – Physik 2001
• Har Gobind Khorana – Medizin 1968
• Lawrence Robert Klein, PhD 1944 – Wertschapswetenschapen 1980
• Paul Robin Krugman – Wertschapswetenschapen 2008
• Robert Betts Laughlin, PhD 1979 – Physik 1998
• Salvador Edward Luria - Biologie 1969
• Murray Gell-Mann, PhD 1951 – Physik 1969
• Eric Stark Maskin – Wertschapswetenschapen 2007
• Daniel Little McFadden – Wertschapswetenschapen 2000
• Robert Carhart Merton, PhD 1970 – Wertschapswetenschapen 1997
• Franco Modigliani – Wertschapswetenschapen 1985
• Paul Lawrence Modrich - Chemie 2015
• Mario José Molina-Pasquel Henríquez – Chemie, 1995
• Robert Sanderson Mulliken, S. B. 1917 – Chemie 1966
• Robert Alexander Mundell, PhD 1956 – Wertschapswetenschapen 1999
• John Forbes Nash Jr. – Wertschapswetenschapen 1994
• William Dawbney Nordhaus, PhD 1967 - Wertschapswetenschapen 2018
• Charles John Pedersen, S. M. 1927 – Chemie 1987
• William Daniel Phillips, PhD 1976 – Physik 1997
• Burton Richter, S. B. 1952, PhD 1956 – Physik 1976
• Adam Guy Riess - Physik 2011
• Paul Anthony Samuelson – Wertschapswetenschapen 1970
• Myron Samuel Scholes – Wertschapswetenschapen 1997
• John Robert Schrieffer, S. B. 1953 – Physik 1972
• Richard Royce Schrock – Chemie, 2005
• Phillip Allen Sharp – Medizin 1993
• Karl Barry Sharpless – Chemie, 2001 und 2022
• William Bradford Shockley, PhD 1936 – Physik 1956
• Clifford Glenwood Shull - Physik 1994
• George Fitzgerald Smoot III – Physik 2006
• Robert Merton Solow, PhD 1951 – Wertschapswetenschapen 1987
• Joseph Eugene Stiglitz, PhD 1966 – Wertschapswetenschapen 2001
• Samuel Chao Chung Ting – Physik 1976
• Susumu Tonegawa – Medizin 1987
• Charles Hard Townes - Physik 1964
• Steven Weinberg - Physik 1979
• Carl Edwin Wieman, S. B. 1973 – Physik 2001
• Frank Anthony Wilczek, Physik 2004
• Oliver Eaton Williamson – Wertschapswetenschapen 2009
• Robert Burns Woodward, S. B. 1936 – Chemie 1965

• Stephen A. Benton – Physiker, Utfinner vun dat Regenbagen-Hologramm
• Emilio Bizzi – Hirnforscher
• Olivier Blanchard - Wertschapswetenschapler
• George Stephen Boolos – Philosoph un Mathematiker
• Rodney Allen Brooks – Roboterforscher un Verhollenskundler
• Vannevar Bush – Elektroingenieur, Utfinner vun dat Hypertext-Prinzip
• Avram Noam Chomsky – Linguist
• William David Coolidge - Physiker
• John Mark Deutch – Chemiker
• Mildred Dresselhaus – Physikerin, Elektronikingenieurin un Informatikerin
• Harold Eugene Edgerton – Photograph
• Jerome Isaac Friedman – Physiker
• Shafrira Goldwasser – Informatikerin, tweefack Gödel-Priesdrägerin, 1993 un 2001
• William Alfred Higinbotham - Atomphysiker
• Robert Samuel Langer - Chemieingenieur
• Walter Henrik Gustav Lewin – Physiker
• Richard Siegmund Lindzen - Physiker un Meteoroloog
• John Little – Managementberader
• Francis Eugene Low – Physiker
• Samuel Jefferson Mason - Elektroingenieur
• Douglas Murray McGregor – Managementtheoretiker
• Silvio Micali – Informatiker
• Marvin Lee Minsky – Informatiker
• William John Mitchell – Architekt un Schriever, Medienwetenschapler
• José Molina-Pasquel Henríquez – Chemiker
• Franco Modigliani – Wertschapswetenschapler
• Philip Morrison – Physiker
• Nicholas Negroponte – Medienforscher
• Seymour Papert – Pädagoog un Informatiker
• Steven Arthur Pinker – Bewusstweenforscher
• Gian-Carlo Rota – Mathematiker un Philosoph
• Christopher Albert Sims - Wertschapswetenschapler, Nobelpriesdräger
• Isadore Manual Singer – Mathematiker (Abel-Pries 2004)
• Robert Merton Solow – Wertschapswetenschapler
• Arthur Robert von Hippel – Elektronikingenieur un Informatiker
• Edgar Henry Schein – Organisationspsycholoog
• Myron Samuel Scholes – Wertschapswetenschapler
• Claude Elwood Shannon – Mathematiker
• Jesse Lowen Shearer – Maschinenbauingenieur, Pionier vun de Hydraulik
• Ivan Edward Sutherland – Informatiker, Pionier vun de Computergrafik
• Sherry Turkle – Psychologin un Soziologin
• Robert Allan Weinberg – Molekularbioloog un Krebsforscher
• Joseph Weizenbaum – Informatiker
• Iván Werning – Wertschapswetenschapler
• Norbert Wiener – Mathematiker, Begrünner vun de Kybernetik
• Otto Piene Künstler (Art and visual studies)
• Tim Berners-Lee – Informatiker, Begrünner vun dat World Wide Web, Entwickler vun den eersten Webbrowser WorldWideWeb, Begrünner un Vörsitter vun dat W3C.
• Rainer Weiss - Physiker un Nobelpriesdräger

• Buzz Aldrin - NASA-Astronaut, tweet Minsch up den Maand
• Virgilio Barco – ehmalger Staatspräsident vun Kolumbien
• Hans Albrecht Bethe – Physiker
• Manuel Blum – Informatiker, Turing-Priesdräger 1995
• Amar Gopal Bose – Ünnernehmer, Entwickler vun Audiogeräten
• Dan Bricklin – Mitutfinner vun VisiCalc, de eerst Tabellenkalkulatschonssoftware för PCs
• Whit Diffie – Mitutfinner vun dat Kryptografieverfohren mit apenlich Slötel un vun dat Diffie-Hellman-Kryptografieverfohren
• Donald Wills Douglas – Een vun de Grünner vun den Luftfohrtkonzern McDonnell Douglas
• Kim Eric Drexler – Nanotechnoloog
• Charles Moss Duke - US-amerikaansch Astronaut, de teinte Minsch up den Maand
• Luis A. Ferré – Gouverneur von Puerto Rico
• José Figueres Ferrer – Präsident von Costa Rica
• Sheldon Kay Friedlander - Ingenieur un Aerosolforscher
• William (Bill) Hewlett – Mitbegrünner vun de Technologiekonzern Hewlett Packard
• Danny Hillis – Mitbegrünner vun de Firma Thinking Machines, Mitgrünner vun de Long Now Foundation
• David Albert Huffman – PhD 1953, Informatiker, hett de Huffman-Kodeeren för verlustfree Datenkompression entwickelt
• John David Jackson - Physiker
• Brewster Kahle – Archivar vun dat WWW, Kämper för de Informatschoonsfreeheit
• Mitchell David Kapor – Software-Ünnernehmer
• John Paul Kotter - US-amerikaansch Ökonom
• Raymond Kurzweil – Utfinner up verscheeden Rebeeden (Musikinstrumente, Schrift- un Spraakerkennungs-Software), Tokunftsforscher un Visionär
• Leslie Lamport – Informatiker, Turing-Priesdräger 2013
• William Benjamin Lenoir - US-amerikaansch Astronaut
• Harry Ward Leonard - Elektroingenieur, Utfinner vun den Ward-Leonard-Umrichter
• Daniel Mark Lewin – Internet-Ünnernehmer
• Arthur D. Little – Grünner vun dat glieknamig Beraderünnernehmen
• Hugh John Lofting – Bauingenieur, Schriever vun „Dr. Doolittle“
• Wolfgang Mayrhuber - Manager, ehemaliger Vorstandsvorsitzender der Lufthansa AG
• Ronald Erwin McNair - Astronaut
• Robert Melancton Metcalfe – Utfinner vun dat Ethernet-Protokoll för Computernetten, Grünner vun 3Com
• Edgar Dean Mitchell - NASA-Astronaut, de sösste Minsch, de den Maand betreden hett
• Benjamin Netanjahu – Premierminister vun Israel
• Robert Norton Noyce – Mitutfinner vun de integreerte Schaltung, Mitbegrünner vun Intel
• Ken Olsen – Grünner vun Digital Equipment Corporation (DEC)
• Ieoh Ming Pei – Architekt
• Debra Satz - Philosophin, Politologin un Perfessersche in Stanford
• David Randolph Scott - US-amerikaansch Astronaut
• George Pratt Shultz – US-Finanz- un Butenminister
• James Harris Simons - Mathematiker, Hedge-Fonds-Manager, bekannt för sien Arbeit an Minimalflachen
• Alfred P. Sloan, Jr. – Automobilünnernehmer
• Louis Henry Sullivan – Architekt
• Lawrence Henry Summers – Wertschapswetenschapler
• Andrew Stuart Tanenbaum – Informatiker, Programmeerer vun Minix
• Janice Elaine Voss - US-amerikaansch Astronautin

• Fred Hapgood: Up the Infinite Corridor: MIT and the Technical Imagination. Perseus Books, 1993, ISBN 0-201-08293-4 (Beschrieven vun de Forschungsaktivität ut de Insider-Perspektive)
• Stewart Brand: How Buildings Learn: What Happens after They’re Built. Penguin, New York 1995, ISBN 0-14-013996-6 (Architekturstudie, behannelt ünner annern verscheeden Bauwarken up den MIT-Campus)
• Julius A. Stratton, Loretta H. Mannix: Mind and Hand - The Birth of MIT. MIT Press, Cambridge 2005, ISBN 0-262-19524-0 (Geschichtlicher Achtergrund to de Grünnen vun dat MIT, ünner anner up Grund vun original Dokumenten)

 Wiktionary: MIT – Bedüdensverklaren, Woortherkamen, Synonymen, Översetten

Massachusetts Institute of Technology. Mehr Biller, Videos oder Audiodateien to’t Thema gifft dat bi Wikimedia Commons.

• MIT Homepage (engelsch)
• Hack gallery (engelsch)
• MIT Technology Review (engelsch)

1. ↑ http://www.topuniversities.com/university-rankings/world-university-rankings/2012, THE-QS World University Rankings 2012, van' 19. März 2013
2. ↑ An Officer's Been Killed and There's a Shooter on the Loose in Boston - Adam Clark Estes The Atlantic Wire, van' 19. April 2013
3. ↑ Mit press in de engelschsprakig Wikipedia
4. ↑ MIT Facts 2006, Enrollment
5. ↑ web.mit.edu
6. ↑ http://web.mit.edu/facts/tuition.html, MIT Facts - TUITION AND FINANCIAL AID (engelsch), afropen an’ 16. April 2014