Rüschenjumfern
| Rüschenjumfern, Diekjumfern | ||||||||||||||||
|---|---|---|---|---|---|---|---|---|---|---|---|---|---|---|---|---|
 | ||||||||||||||||
| Systematik | ||||||||||||||||
| ||||||||||||||||
| Wetenschoplich Naam | ||||||||||||||||
| Lestidae | ||||||||||||||||
| Calvert, 1901 |
De Rüschenjumfern oder Diekjumfern (Lestidae) sünd ene Familie mank de Jumfern (Zygoptera). Dor höört se ok mit to de Goldpeer (Odonata) to. In Middeleuropa gifft dat negen Aarden vun düsse Familie.
Kennteken
De Rüschenjumfern ehr Lief is dünn, de utwussen Deerter sünd bruun (Winterjumfern, Geslecht „Sympegma“) oder metallgröön (Rüschenjumfern vun dat Geslecht „Lestes“). Vunwegen dat de Larven in stille un tomeist lüttje Water wassen doot, weert düsse Jumfern meist bi Dieken, Pööl oder lüttjere Meeren funnen. Dor kann dat bi vörkamen, dat verscheden „Lestes“-Aarden tohopen vörkaamt.
De Grieptangen an dat Achterenne vun de Heken seht unnerscheedlich ut un „passt“ bloß bi de richtigen Seken. Dor üm gifft dat keen Paarung buten de Grenzen vun de Aart, ofschoonst de Heken ok an frömde Seken ranflegen doot.
Vermehren
To’n Vermehren grünnt de Heken vun de Rüschenjumfern Revieren vun en Grötte vun 0,5 bit 1,5 m² üm Twiegen vun Büsche un Bööme an’t Över ümto. Dorbi warrt ok üm den Rang vun de Heken streden. De böversten Revieren sünd de betern. Wenn de Revieren indeelt sünd, denn so kaamt in bi 10 bit 15 m Hööchde de Seken anflagen un en Reeg vun Heken suust to de sülvige Tied los un achter dat Seken ran. Een vun jem kriggt ehr denn to faten un kann sik denn mit ehr paaren.
Dat Heken höllt dat Seken na de Paarung wieterhen mit de Grieptangen an’t Achterlief fast. So mütt de Seken de Eier mit de Heken tosamen as „Tandem“ afleggen. De Eier weert tomeist in Plantendelen över Water afleggt. De Weidenjumfer (Chalcolestes viridis) stickt dor ehre Eier jummers bi in holtige Twiegen över Water. En Reeg vun Aarden leggt de Eier ok unner Water in dat Substrat.
De Larven leevt an’n Grund vun dat Water oder an Waterplanten. Na um un bi twee Maanden sünd de Larven groot. Bit dorhen hefft se acht bit ölven mol de Huut afstrepelt. De Aarden „Lestes“ un „Chalcolestes“ överwintert as Ei, de Winterjumfern överwintert as utwussen Jumfer. Se sünd de eenzigen Aarden mank de Goldpeer, de as utwussen Insekt överwintern doot.
Systematik
- Familie: Rüschenjumfern oder Diekjumfern (Lestidae)
- Soort: Gemeene Rüschenjumfer (Lestes sponsa)
- Soort: Tangenrüschenjumfer (Lestes dryas)
- Soort: Süüdliche Rüschenjumfer (Lestes barbarus)
- Soort: Spiddelige Rüschenjumfer (Lestes virens)
- Soort: Holtrüschenjumfer (Lestes viridis)
- Soort: Brune Winterjumfer (Sympecma fusca)
- Soort: Nöördliche Winterjumfer (Sympecma paedisca)
Biller
-
-
Süüdliche Gördel-Rüschenjumfer (Austrolestes cingulatus) -
-
Süüdliche Rüschenjumfer (Lestes barbarus) -
Tangenrüschenjumfer (Lestes dryas) -
Gemeene Rüschenjumfer (Lestes sponsa) -
Spiddelige Rüschenjumfer (Lestes virens) -
Brune Winterjumfer (Sympecma fusca)
Literatur
- Bellmann H (1993): Libellen beobachten - bestimmen, Naturbuch Verlag Augsborg
- Jurzitza G (2000): Der Kosmos-Libellenführer, Franckh-Kosmos Verlags GmbH & Co., Stuttgart
- Sternberg K, Buchwald R (2000): Libellen Baden-Württembergs, Eugen Ulmer Verlag
- Jödicke R (1997): Die Binsenjungfern und Winterlibellen Europas, Die Neue Brehm-Bücherei 631, Westarp-Wissenschaften, Meideborg
