Stormvagels
Stormvagels (Procellariiformes) sünd en Ornen mank de Vagels. All tosamen könnt se to de Seevagels torekent weern un leevt up de hoge See. Tohuse is de Ornen up de ganze Welt, up all Ozeane, man de meisten Aarden sünd rund um Neeseeland to tohuse. Mank de Stormvagels gifft dat fiev Familien. Twee vun jem kaamt nich in den nöördlichen Atlantik vor: De Süüdlichen Stormvagels un de Albatrosse. De Albatrosse könnt bannig groot weern un mehr, as een m lang weern. Ehre Flunken spannt se bit hen to dree m wiet ut. Man de Alkstormvagels un de annern Familien sünd man bannig lüttjet. De lüttjeste Aart spannt ehre Flunken man just 32 cm wiet ut.
Bröden doot de Stormvagels in Kolonien up Eilannen buten in’e See, wo dat keen Roofdeerter gifft. De groten Aarden boot ehre Nester up open Land, de lüttjen boot se in Felsspleten, annere natüürliche Hollten un in Löcker, de utbuddelt wurrn sünd. De Vagels kehrt jummers wedder torüch na den Platz, wo se boren wurrn sünd. Se blievt ok bi ehren Partner, den se nu mol afkregen het, towielen ok dat ganze Leven lang. Beide Olen bröödt un versorgt de Jungen. Dor bruukt se, vergleken mit annere Vagels, bannig lang for. Sojust de Jungen utflagen sind, scheert sik de Olen dor nich wieter um.
Taxonomie
- Familie Albatrosse (Diomedeidae)
- Familie Alkstormvagels (Procellariidae)
- Familie Nöördliche Stormvagels (Hydrobatidae)
- Familie Süüdliche Stormvagels (Oceanitidae)
Kiek ok bi
- List vun Vagels, mit allerhand plattdüütsche Vagelnaams un Naams ut de Naberspraken
- Projekt: Deerternaams up Platt
Literatur
- Michael Brooke: Albatrosses and Petrels across the World. Oxford University Press, 2004, ISBN 0-19-850125-0
