Emanuel Schiffers

Schiffers weer de Söhn vun nah St. Petersburg inwannert düütsch Öllern. In St. Petersburg hett he van 1860 bit 1867 dat Gymnasium besöcht un ansluutend bit 1871 Naturwetenschapen studeert. Dornah hett he as Huuslehrer arbeit.

Dat hett he, en Polyglott, de Russisch, Düütsch, Franzöösch un Engelsch snacken dee, aber bald för dat Schachspeel, dat he all as 15-Johriger kennenlehrt harr, upgeeven. As he 1873 dat eerste Mal mit Michail Tschigorin, noch ünner Vörgaav, speel, weer he all de beste Schachmeester vun Russland.

Schiffers gull as en uneegennützig Minsch, de sien Weeten geern wieder geev. He is as en vun de eerst Schachlehrer vun Russland in de Geschichte ingahn, 1889 hull he as eerst en apenliche Vörlesung to de Schachtheorie. He führ Schachspalten in verscheeden St. Petersburger Zeitungen un de Tietschrift Niwa. Van 1894 bit 1898 weer he Herutgever un Redakteur vun dat Schachblatt Schachmatny Schurnal. He hett in Fortsetzungsartikeln in sien Schachspalten den Samoutschitiel schachmatnoj igry [De Autodidakt vun dat Schachspeel] herutbrocht, de nah sien Dood 1907 in St. Petersburg as Book herut keem un bit in de sowjeetsch Tiet (1926 nochmals in en Bearbeitung dör Nenarokow) en beleevt Leitfaden bleev, de völ Uplagen beleeven dee.

Schiffers wunn Wettkämpe gegen Andrei Chardin (1895), Friedrich Amelung (1877), J. Schmidt (1879), Simon Alapin (1879), N. Mitropolsky (1890) un annern.

In sien Schöler Michail Tschigorin is Schiffers denn aber en övermächtiger Konkurrent heranwussen. 1878, in hör eerst Wettkamp ahn Vörgaav, verlor Schiffers mit 3:7 (+3 =0 −7), den tweeten Wettkamp (ok 1878) wunn he aber mit 7,5:6,5 (+7 =1 −6). De beid russisch Meester hemm noch veer wiedere Wettkämpe tegennanner bestreeden (1879, 1880, 1895 un 1897), de Schiffers aber allesamt verloren hett.

1896 hett Wilhelm Steinitz Russland besöcht un speel in Rostow an‘n Don en Wettkamp mit Schiffers. Schiffers weer ok hier ünnerleegen, aber reck en ehrenvull Resultat vun 4,5:6,5 (+4 =1 −6).

Schiffers nehm an acht groot internatschonalen Schachturnieren deel. Sien best Resultat reck he in St. Petersburg 1879 (4. Platz). Ebenfalls to nömmen is sien sösste Platz in Hastings 1895 vör Curt von Bardeleben, Richard Teichmann, Carl Schlechter, Joseph Henry Blackburne usw.). He speel ok bi de beid eerst All-Russischen Meesterschapen, 1899 un 1900/1901 mit un wurr beid Malen Tweet achter Tschigorin.

In sien letzt Levensjohren truck sück Schiffers, de immer starker an Depressionen lieden dee, vun dat Schach un de Minschen torüch. Nahdem he sück dör en Störrt swoor Besehren totrucken hatt, hett he sück dorvan nich mehr verhaalt un is bald dorup storven.

• Indrag bi 365Chess.com
• En beten Biographie (russisch, deelwies ok düütsch)
• Indrag bi chessgames.com (engelsch)