Offenwardermoor

De Oort liggt in dat Moor von dat Siedland in Oosterstood. Na Oosten slütt sik de Oosterholter Geest an. Dat Water ut dat Rebeed flütt över Gravens un den Indiekkanaal na de Werser hen af, de veer Kilometer in’n Westen langslöppt. In’n Noordoosten liggt dat Naturschuulrebeed Bargsmoor/Rechtenflethermoor.

De Naveröörd sünd Saanstermoor in’n Noorden, Rechtenflethermoor, Wittenbarg un Hagen in’n Noordoosten, Uthlederbarg in’n Oosten, Weersbermoor un Uthleer in’n Süden, Weersbe un Offenwarden in’n Süüdwesten un Saans in’n Noordwesten.

Offenwardermoor is as Moorkolonie grünnt worrn.

In de Franzosentied von 1810 bet 1814 hett de Oort to de Mairie Weersbe in’n Kanton Hagen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to’n Bezirk Süüd-Oosterstood von dat Amt Hagen tohöört. Na 1885 weer dat in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.

1968 is de Gemeen Offenwarden Deel von de Gemeen Saans worrn. An’n 1. Januar 2014 is de Gemeen Saans denn Deel von de ne’e Gemeen Hagen worrn. Sietdem höört Offenwardermoor to de polietsche Oortschop Offenwarden binnen de Gemeen.

Offenwardermoor is evangeelsch-luthersch präägt un höört to dat Kaspel von de Johannes-de-Döper-Kark in Saans.

För de Kathoolschen is de Hillig-Hart-Jesu-Kark in Geestmünn tostännig.

De Doden warrt op’n Karkhoff Saans begraven.

En Denkmaal för de Fullenen ut de twee Weltkrieg’ steiht in Offenwarden.

För den Oort is de freewillige Füürwehr Offenwarden mit tostännig.

Von Offenwardermoor föhrt lüttjere Straten na de Kreisstraat 51 in’n Noorden, na de K 50 in’n Westen un na de Landsstraat 134 in’n Oosten. De K 51 löppt in’n Westen na Saans an de K 50 un in’n Oosten na Hagen an de L 134. De K 50 geiht in’n Noorden över Rechtenfleth, Neenlann un Büttel na Deesdorp un in’n Süden na Weersbe un Rechtebe. De L 134 löppt in’n Süden över Uthleer un Meyenborg na Swonewebel un Blomendal un in’n Noordoosten över Hagen un Braamst na Stubben un Beverst.

De nächste Autobahn is de Autobahn 27 (Afsnidd Bremen–Bremerhoben). De Opfohrt 12 Hagen liggt good twee Kilometer in’n Noordoosten von Offenwardermoor an de K 51.

De Bahnhööv Wulsdörp, Lox, Luunst, Stubben un Lübbs an de Bahnlien Bremen–Bremerhoben sünd all lieker wied so üm un bi 19 Kilometer wied weg. Op de Nedderwerserbahn hett dat von 1911 bet 1931 Personenverkehr geven. De Bahnhööv Saans un Offenwarden legen good veer Kilometer in’n Westen.

De Volksschool in Offenwardermoor is von 1857 bet 1958 boot worrn. Se hett aver blots bet 1969 bestahn. In dat Johr hett de lütte School dichtmaakt un de Schölers sünd to’n gröttsten Deel op de School in Weersbe wesselt. Op de School in Offenwardermoor güngen aver ok Schölers von’n Uthlederbarg. Disse Schölers sünd to’n lütten Deel an de School in Uthleer wesselt. De School in Weersbe hett bet 2008 bestahn. Sietdem gaht de Schölers ut Offenwardermoor op de Grundschool Uthleer.

1. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 173
2. ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
3. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 460
4. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
5. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 155