Bliende slange

Umdat de bliende slange op n slange lik, wörden ze vake doodemaakt deur luui die denken dat t um n gevaorlike slange geet (vandaor oek de naam bliende slange). Toch bin der n paor kenmarken die oek vanaof n veilige aofstand laoten zien dat t um n onschuldige everdesse geet;

• Slangen hebben gien ooglejen, en de bliende slange wel.
• De kop van slangen is meestentieds dreehoekig, die van de bliende slange is typies everdesseachtig en zonder dudelike nekke.
• Bliende slangen hebben kleine ogen, veule slangen hebben grote ogen.

De bliende slange kump veur in grote delen van Europa en Klein-Azië. In Nederlaand kump e op de Veluwe en op de Utrechtse Heuvelrogge nog algemeen veur. In Limburg, langes t Maasdal en in de Zuud-Limburgse heuvellaanden he'j der n hele kwak zitten. En veural in de westelike regio van Braobaant kump e nog wer en were veur. Zien woenplekke besteet uut begreuide umgevingen mit n struiige-lage waorin t dier kan schulen en jagen. Umdat t n soort is die bie tweeduuster aktief is, wörden e niet zo vake overdag ezien. In Nederlaand is de bliende slange veurnamelik te vienen in bossen op open plekken, bosraanden en houtwallen. Klimmen dut disse everdesse niet grege en hij jaagt mit name op wat e op de bojem vient. Umdat de everdesse niet zo gauw is, vangt e oek wat langzamere prooien zo as (naakt)slekken, regenwurms, insekten en de larven.

De bliende slange is in grote delen van zien verspreidingsgebied niet zeldzaam mer geet in veule gebiejen in antal en verspreiding achteruut. De belangriekste oorzaken bin t verdwienen of veraanderen van t laandschap op zowel grote as kleine schaole. t Verdwienen van bieveurbeeld natuurlike houtstapels en komposthopen hef n negatieve invleud umdat dit de favoriete schuulplekken en wienterkwartieren bin. Oek vormp de anwezigheid van fazanten, kiepen, huusdieren en aandere dieren die deur de meens in-ebröcht bin n anzienlike bedreiging. Umdat de bliende slange aordig honkvast is en niet zo vlogge, verspreit de soort zich niet alderbarstends rap.

De stichting 'Reptielen Amfibieën Vissen Onderzoek Nederland' (RAVON) dut onderzeuk naor t veurkoemen van de soort binnen Nederlaand. In 2005 wördden der meer bliende slangen waoreneumen, mer in 2006 bleef t antal gelieke. Over t algemeen is volgens RAVON sprake van n kleine toename van disse everdesse in Nederlaand.^[1] De bliende slange is in Nederlaand en België n bescharmde diersoort, die niet evöngen, in gevangenschap ehöllen of edood mag wörden.

n Probleem bie t in kaorte brengen van de verspreiding van de bliende slange is de verbörgen levenswieze; bliende slangen laoten der eigen haost nooit zien. De bliende slange is deurdat e onder veurwarpen schuult toch goed in de smiezen te houwen deur de zogenaamde plaotjesmethode. Hierbie wörden (t liefst n duustere) plaote op de bojem eleegd die regelmaotig bezöcht wörden.

Bie de bescharming van de bliende slange kan gebruuk emaakt wörden van aofscharmende systemen um de dieren binnen t territorium te houwen. Dit lik enigszins op de paddenscharmen die bie padden gebruikt wörden um de dieren aof te scharmen van verkeerswegen.^[2]

• Waornemingen kunnen hier emeld wörden.
• Kaorte van Nederlaand mit waornemingen

• Drèents: haoswörm, haozelwörm, hazelwörm, heesworm, heeswurm, ieswörm
• Stellingwarfs: haeze(l)worm
• Veluws: bliende slang(e)

1. ↑ RAVON - Bliende slange - Webstee
2. ↑ Herpetosure - Slow worm fencing

• n Stel foto's van de bliende slange