International Standard Name Identifier

Inta FAQ do scîto d’Internétte isni.org o l'é scrîto che 'n ISNI o l'é formòu da 16 cîfre, con l'ùrtimo caràtere ch'o l'é 'n nùmero de contròllo^[2]. O nùmero do contròllo o peu êse ségge 'na cîfra decimâle che o caràtere "X" e o l'é determinòu in sciâ bâze de 15 cîfre decimâli che ghe stàn davànti, dêuviàndo l'algorìtmo ISO/IEC 7064, MOD11-2^[3].

• MARC: o l'é stæto propòsto pe scrîve l'ISNI sénsa dêuviâ di spàççi, prezénpio (isni)1234567899999799^[4]
• isni.org URL: sénsa spàççi, prezénpio http://www.isni.org/isni/0000000122805510
• viaf.org:
  • URL https://viaf.org/viaf/59091300/
  • URL https://viaf.org/processed/ISNI%7C0000000122805510
  • i dump di dæti dêuvian a fórma ISNI|0000000122805510

Inta vizoalizaçión o l'é de spésso mostròu con di spàççi.

• isni.org^[5]
• viaf.org^[6]

L'ISNI o permétte d'identificâ 'na çèrta identitæ, cómme o nómme fâso de 'n outô ò a stànpa dêuviâ da 'n editô, co-in nùmero ùnico. Sto nùmero chi o peu dónca êse ligòu a un di âtri identificatoî dêuviæ da-i mézzi d'informaçión pe identificâ nómmi e âtre fórme d'identitæ.

In ezénpio de l'ûzo de 'n nùmero de quésto tîpo o l'é l'identificaçión de 'n muxicìsta che però o l'é scritô de mûxica e de poêxîe ascì. Dónde o poiéiva êse contenporaniaménte identificòu inte vàrie bànche dæti dêuviàndo scistêmi diferénti d'identificaçión, ségge pùblichi che privæ, inte l'ànbito do scistêma ISNI o gh'aviéiva 'n sôlo eleménto ISNI conligòu. E vàrie bànche dæti poriéivan dónca scangiâ di dæti in sce quélla identitæ in particolâ sénsa fâ ricórso a métodi dizordinæ cómme o paragón de strìnghe de tèsto. In ezénpio ch'o vêgne de spésso mensonòu pi-â léngoa ingléize són e dificoltæ che s'incóntran inte l'identificaçión de 'n çèrto "John Smith" inte 'na bànca dæti. Scibén che gh'é di bèlli eleménti pe "John Smith" o no l'é de lóngo ciæo l'eleménto ch'o corispónde a-o "John Smith" domandòu.

Se 'n outô o l'à publicòu di tèsti sott'a vàrri nómmi ò nómmi fâsi, ciaschedùn de sti nómmi chi o gh'à d'avéi o seu ISNI.

L'ISNI o peu êse dêuviòu da bibliotêche e archìvvi quànde condivìddan informaçioìn de catàlogo. Pe de ciù, pe 'na riçèrca ciù precîza de informaçioìn in sciâ Ræ e inte bànche dæti, o peu agiutâ inta gestión di dirìtti a-o de la di confìn naçionâli e inte l'anbiénte digitâle.

I identificatoî ORCID (Open Researcher and Contributor ID) conscìstan inte 'n blòcco de identificatoî ISNI riservòu a-i riçercatoî académichi^[7] e aministròu da 'n'òrganizaçión destacâ^[7], scibén ch'a travàggia inte 'n mòddo cordinòu a l'ISNI^[7][8]. Ògni riçercatô o peu creâ e rivendicâ o pròpio identificatô ORCID^[8].

Segóndo l'ISO, l'outoritæ de registraçión pe l'ISO 27729:2012 a l'é l'ISNI International Agency^[9], ch'a gh'à a seu sêde a Lóndra (c/o EDItEUR)^[10]. St'outoritæ chi a l'é consciderâ, segóndo o Companies Act 2006, cómme 'na socjêtæ privâ a responsabilitæ limitâ^[11].

L'International Agency a l'é de sòlito conosciûa sott'a-a sîgla de ISNI-IA^[12][13].

Quésta socjêtæ sénsa òbietîvo de goâgno registrâ into Régno Unîo a l'é stæta fondâ da 'n consòrçio d'òrganizaçioìn formòu da-a Confédération Internationale des Sociétés d'Auteurs et Compositeurs (CISAC), da-a Conference of European National Librarians (CENL), da l'International Federation of Reproduction Rights Organisations (IFRRO), da l'International Performers Database Association (IPDA), da l'Online Computer Library Center (OCLC) e da ProQuest. A l'é controlâ da diretoî nominæ da quéste òrganizaçioìn e, into câxo do CENL, da raprezentànti da Bibliotêca naçionâle de Frànsa (Bibliothèque nationale de France) e da British Library.

In'agençîa de registraçión a fornìsce l'interfàccia tra quélli che domàndan o còdice ISNI e l'Agençîa de Asegnaçión ISNI^[14].

Do 2018, YouTube o l'é vegnûo 'n regìstro ISNI, diciaràndo a seu intençión de comensâ a creaçión d'identitæ ISNI pe-i muxicìsti che gh'àn caregòu i seu vìdeo^[18]. L'ISNI o prevédde che, cómme rizultâto de quésta decixón, o nùmero di seu ID "o cresciâ fòscia de 3-5 milioìn inti pròscimi dôe ànni"^[19].

Do 2020 a Sound Credit, insémme a l'ISNI, a l'à anonçiòu che-e registraçioìn a l'ISNI pò-u setô da mûxica saiàn de bàdda e outomàtiche. O scistêma de registraçión de bàdda o l'é pàrte da creaçión de 'n profî uténte Sound Credit, dêuviâ pò-u seu inportànte scistêma pe l'atribuçión di créditi. O l'inclùdde 'na riçèrca outomàtica pe evitâ ISNI dóggi e 'n certificâto creòu da-o scistêma de registraçión Sound Credit pe ofiçializâ i còdichi ISNI apénn-a registræ^[20].

I ménbri de l'ISNI (ménbri de l'ISNI-IA^[21]), a-i 11 de lùggio do 2018, són^[21]:

• ABES (French Bibliographic Agency for Higher Education)
• Brill Publishers
• CEDRO (Centro Español de Derechos Reprográficos)
• CDR (Centrale Discotheek Rotterdam)
• Copyrus
• FCCN
• Archìvi Naçionâli Françéixi (Archives nationales de France)
• Universcitæ de Harvard
• Iconoclaste
• Irish Copyright Licensing Agency (ICLA)
• ISSN International Centre
• Universcitæ La Trobe
• Bibliotêca do Congrèsso
• Bibliotêca MacOdrum, Universcitæ de Carleton
• Bibliotêca Naçionâle da Finlàndia
• Bibliotêca Naçionâle da Nêuva Zelànda
• Bibliotêca Naçionâle da Norvéggia
• Bibliotêca Naçionâle da Svéçia (Kungliga Biblioteket)
• Publishers' Licensing Services
• Bibliotêca UNSW

L'ISNI-IA a l'adêuvia 'n scistêma d'asegnaçión ch'o conprénde 'n'interfàccia uténte, 'n schêma de dæti, di algorìtmi de dizanbigoaçión e 'na bànca dæti ch'a sódisfa i requixîti do stàndard ISO, dêuviàndo ànche a tecnologîa existénte quànde poscìbile. O scistêma o l'é bazòu sorviatùtto in sciô servìçio Virtual International Authority File (VIAF), ch'o l'é stæto svilupòu da OCLC pe l'ûzo inte l'agregaçión di catàloghi de bibliotêche.

L'intrâ a-o scistêma d'asegnaçión e a-a bànca dæti, ciù che a-i nùmeri che vêgnan generæ cómme output do procèsso, o l'é controlòu da òrganìsmi indipendénti conosciûi cómme "agençîe de registraçión". Quéste agençîe de registraçión tràtan diretaménte co-e cazànn-e e garantìscian che i dæti séggian fornîi inte di formâti adàtti e reconpensàndo l'ISNI-IA pe-i cósti de mantegniménto do scistêma de asegnaçión. E agençîe de registraçión vêgnan nominæ da l'ISNI-IA ma són gestîe e finançiæ in mòddo indipendénte.

A tabèlla chi aprêuvo a contêgne di dæti in sciâ covertûa de l'ISNI, pe milioìn d'identitæ de tùtti i tîpi, cómme milioìn de persónn-e, milioìn de riçercatoî (conpréixi inte persónn-e ascì) e de òrganizaçioìn^[22].

• (EN) Karen Smith-Yoshimura, Janifer Gatenby, Grace Agnew, Christopher Brown, Kate Byrne, Matt Carruthers, Peter Fletcher, Stephen Hearn, Xiaoli Li, Marina Muilwijk, Chew Chiat Naun, John Riemer, Roderick Sadler, Jing Wang, Glen Wiley e Kayla Willey, Addressing the Challenges with Organizational Identifiers and ISNI, Dublin, Ohio, OCLC Research, Arvî 2016.

•   Wikimedia Commons a contêgne di files in sce International Standard Name Identifier

• (EN) Scîto ofiçiâ, in sce isni.org. URL consultòu l'8 novénbre 2021.