Jekaterinaburg

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Jekaterinaburg, Jekaterinenburg, Jekaterinburg of Ekaterin(a/e)burg (Rössisch: Екатеринбург, Yekatyerinbóérgk) is de veerde stad vaan Rösland, de hoofstad vaan 't oblas Sverdlovsk, ’t ikkenomisch en cultureel centrum vaan de berg vaan de Oeral, es ouch de hoofstad vaan 't Fidderaol Distrik Oeral. Daoneve ligk 't centraol in ’t supercontinent Eurazië en ligk 't volges de traditionele definitie vaan Europa percies op de grens vaan dat continent en Azië. Vaanoet Moskou gezeen steit de stad bekind es de “poorte vaan Siberië”.

De stad had in 2010 1.349.772 inwoeners en 'n bevolkingsdeechte vaan 2.727 lui de veerkante kilometer. Ze is 495 veerkante kilometers groet. 't Ligk in 'n tiedszone die doorgaons is verneump nao häör, de Jekaterinaburgse tiedzone, en 't is daomèt veer oor later in Jekaterinaburg es in Limbörg. De stad woort gestiech op 18 november 1723 door d'n Tsaar en verkraog häöre status es stad in 1796. Tösse 1924 en 1991 droog de stad de naom Sverdlovsk, umtot de Sovjet-Unie neet wow tot plaotse, veural groete stei, de lui rappeleerde aon de Tsaristischen tied.

Jekaterinaburg steit bekind um häör bleujetege historie, mèt de executie vaan Tsaar Nicholas II en zien femilie in 1918 en de Mafiabloodbade in de jaore 90 es examplarisch. Daoneve steit de stad bekind es 't ikkenomisch en cultureel centrum vaan de Oeral. Mèt naome de metaolindustrie heet nog ummertouw e groet positief effek op de welvaart vaan de stad en häör naobije dörper.

• Ingelstaolege Wikipedia
• Nederlandstaolege Wikipedia
• Lonely Planet: Russia & Belarus (Veerde editie), p. 436