Hend Sabry

Hend Sabry
akteur
Hend Sabry yn 2011 op 'e omslach fan it tydskrift Tunivisions.
persoanlike bysûnderheden
echte namme	Hend Mohammed El-Moldy Sabry
nasjonaliteit	Tunezysk (fan berte) Egyptysk (troch har houlik)
berne	20 novimber 1979
berteplak	Kebili (Tuneezje)
etnisiteit	Tunezysk-Arabysk
jierren aktyf	1994 en 2000 – no
offisjele webside
www.hendsabry.com

Hend Sabry, ek stavere as Hend Sabri (Arabysk: هند صبري‎; folút: Hend Mohammed El-Moldy Sabry; Kebili, 20 novimber 1979) is in Tunezysk aktrise, model en abbekate dy't wennet en wurket yn Egypte. Hja is troud mei in Egyptyske sakeman en hat in dûbele nasjonaliteit. Sabry is ien fan 'e populêrste aktrises fan 'e Arabyske wrâld; it tydskrift Arabian Business neamde har yn 2013 ien fan 'e hûndert ynfloedrykste Arabyske froulju fan 'e wrâld. Yn 2010 waard se troch de Feriene Naasjes oansteld as goodwill-ambassadrise tsjin 'e honger foar it World Food Programme.

Sabry waard yn 1979 berne yn Kebili, yn it suden fan Tuneezje. Hja genoat fuortset ûnderwiis oan it Pierre Mendès France Lyseum yn Tunis en neitiid studearre hja rjochten oan 'e Universiteit fan Tunis. Nei't se op dat mêd in mastergraad behelle hie, waard se abbekate oan it hof fan berop yn Tunis.

Yn 1994, doe't se fyftjin jier wie, makke Sabry har akteardebút as Aliya yn 'e Tunezyske film Samt al Qosor ("De Stiltes fan it Paleis"). Foar dy rol wûn se datselde jiers de priis yn 'e kategory bêste aktrise op 'e Filmdagen fan Kartago (JCC). Neitiid wie se jierrenlang drok mei har stúdzje, mar yn 2000 pakte se it aktearjen wer op. Se spile yn films as Mâsem al Redjal (2000, "It Seizoen fan 'e Manlju") fan regisseur Mûfida Tlatli; Al Katiba (2002, "De Boekferkeaper") fan Nâfel Saheb-Ettaba; en Ara2is al Tiin (2002, "De Breiden fan Modder") fan Noeri Bûzid.

Sabry spile ek yn in protte Egyptyske films, wêrfan't de earste yn 2001 Mozakarat Morahiqa ("It Deiboek fan in Tiner") wie. Oare foarbylden binne: Halet Hobb (2004, "In Gefal fan Leafde"), fan Saäd Hindawi, en Imarat Yacoubian (2006, "It Yacoubian-gebou"), fan Marwan Hamed en Adel Imaam. Yn 2005 wûn Sabry de priis foar bêste aktrise fan 'e Uny fan Egyptyske Sjoernalisten foar har rol as Yosriea yn 'e film Achla al Awqat (2004, "De Moaiste Mominten"), fan Hala Chalil. Dat jiers siet se ek yn 'e sjuery dy't de ynstjoerings foar it Ynternasjonaal Filmfestival fan Marrakesj beoardiele moasten. Yn 2008 wie se de tsjinspylster fan Hisjem Rostom yn 'e Ingelsktalige film Whatever Lola Wants (2008), en yn 2009 wurke se as stimaktrise mei oan 'e tekenfilm Heliopolis, wêryn't se har stim oan it personaazje Nagla liende.

Ek yn 2009 waard se mei Dhafer El Abidine en Mohammed Driss cast yn ien fan 'e haadrollen fan 'e Tunezyske tillefyzjesearje Maktûb ("It Lot"), fan regisseur Sami Fehri en senarioskriuwer Tahar Fazaa. Se wie dat jiers ek sjuerlid op it Ynternasjonaal Filmfestival fan Abû Daby foar de kategory dokumintêres. Yn 2010 en 2011 spile Sabry mei de Egyptyske akteur Mohammed Heneidi yn twa harkspullen op 'e radio. Boppedat hie se yn 2010 grut súkses mei de Egyptyske tillefyzjesearje Ajza Atgawiz ("Ik Wol Trouwe"), dy't útstjoerd waard ûnder de Ramadan fan dat jier. Dêryn spile se de haadrol fan Ola, dy't obsedearre is troch it houlik, mar de iene mooglike ferloofde nei de oare ôfservearret. Dat jiers waard se ek beneamd ta grutofsier yn 'e Tunezyske Oarder fan Fertsjinste.

Yn 2014 wie Sabry mei Ghada Abdel Aal ien fan 'e senarioskriuwsters fan 'e Egyptyske tillefyzjesearje Embratorijet Miin ("Waans Ryk?"). Yn dy rige wurdt in Egyptyske húshâlding om utens folge, wêrfan't de âldelju, út hommels opkommende nostalgy, beslute werom te gean nei harren heitelân. As se ienris werom binne wurde Amira (spile troch Sabry), har man Sami en harren bern konfrontearre mei in grut tal ûnfoarsjoene omstannichheden. Yn desimber 2014 waard Sabry ta ridder beneamd yn 'e Frânske Ordre des Arts et des Lettres, in ûnderskieding takend troch de Frânske steat op foarspraak fan it Ministearje fan Kultuer. Yn 2017 wûn se fierder de Faten Hamama Priis foar Treflikens op it Ynternasjonaal Filmfestival fan Kaïro. Dat jiers wie se te sjen as de froulike farao Hatsjepsût yn 'e film Al-Kanz: Al-Hakika wa al-Chajal ("The Skat: Wurklikheid en Fantasij"), in rol dy't se yn 2019 jitris spile yn Al-Kanz 2.

Njonken har aktearjen is Sabry ek aktyf as model. Yn 2010 waard se foar it Midden-Easten it gesicht fan it kosmetikamerk L'Oréal. Ek hat se ferskate reklamespotsjes opnommen foar in oar kosmetikamerk, Garnier. Mei fotoreportaazjes hat se yn ferskate tydskriften stien, wêrûnder Tunivisions, Layalena Magazine, Sayidaty, eniGma Magazine, What Women Want… Magazine en Charisma Magazine.

Yn 2010 naam Sabry op Facebook diel oan 'e kampanje Opstân fan Froulju yn 'e Arabyske Wrâld, dy't gelikensens tusken de seksen oanfiterje woe sa't de Universele Ferklearring fan 'e Rjochten fan 'e Minske dy foarstiet. Datselde jiers waard se troch de Feriene Naasjes oansteld as goodwill-ambassadrise tsjin 'e honger foar it World Food Programme. Nei de oanslach op it Nasjonaal Museum Bardo, wêrby't yn Tuneezje yn maart 2015 24 minsken omkamen, sette Sabry útein mei in promoasjekampanje foar har heitelân as toeristyske bestimming, wêrfoar't se meiwurking wûn fan ferskate oare bekende Tuneezjers, lykas Dhafer El Abidine, Dorra Zarrûk, Feriel Gradja en Latifa Arfawi.

Yn maart 2018 troude Sabry mei de Egyptyske sakeman Achmed Sjeryf. De brulloft fûn plak yn it Kobbet El Nhas-paleis yn it Tunezyske Manûba. Troch har houlik krige Sabry behalven de Tunezyske ek de Egyptyske nasjonaliteit. Sy en har man hawwe twa dochters, Aliyah en Laila. It gesin wennet yn Kaïro.

• (in) Offisjele webside fan Hend Sabry
• (in) Folsleine filmografy fan Hend Sabry yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: Notes et références, op dizze side. Commons  Ofbylden dy't by dit ûnderwerp hearre, binne te finen yn de kategory Hend Sabry fan Wikimedia Commons.