Virgili

I studiôs a cjapin informazions su le vite di Virgili di sôs oparis e di biografiis scritis te tarde antighitât e te ete di mieç, che a lôr volte a àn come risultive massime il De poetis (Sui poetis) di Suetoni; unevore ipuartante e je chê che Eli Donât al premetè al so comentari des oparis di Virgili.

Al nassè tal 70 p.d.C. a Andes, un vilaç dongje Mantue forsit di une femine di non Magia Polla. Une biografie medieval scrîf che al jere fi di un ciertun Virgili, che al ven clamât rusticus (vadì contadin), ma no o savn se rusticus al è il non o ben si riferis a so mistîr; i antîcs a àn stramandât che so pari al lavorave verementri cu la tiere o cu lis âfs, ma al podarès jessi dome une informazion nassude dal contignût e de filosofie des Georgichis e des Bucolichis di Virgili; mediant che so pari i de une educazion di di siôr, probabilmentri nol jere un cossan e al possedeve almancul un toc di tiere. Al scomençà i sos studis di retoriche a Cremone, citât vicine, par continuâ a Milan e a Rome, a la scuele di Epidi, che al fo mestri ancje di August. Molade la retoriche, che no i lave propite jù, al passà di stâ a Napoli, dulà che al leve te scuele epicureane di Siron, che lu influenzà un grum; salacor al metè dongje achì il so gîr di amis poetis: Luzi Vari, Plozi Tuche e Orazi. Al vivè simpri unevore imbotonât e fûr di man, cence interès pe politiche, propite secont la filosofie epicureane.

Fra il 42 e il 39 al scrivè lis Bucolichis; in chescj agns al ve di frontâ un berdei: dopo che i complotants a vevin fât fûr Juli Cesar e a jerin stâts sbaraiâts a Filippi, si veve di cjatâ tiare par paiâ lis armadis e si incjamerà cjamps dongje Cremone, citât aleade ai sassins di Cesar. Stant che i veterans a jerin masse, si decretà di confiscâ ancje a la vicine Mantue, dulà che ancje Virgili al veve il so cjamput, che al rivà a mantignî dome cul judori dal so amì Asini Polion. Lis Bucolichis a forin preseadis un grum e Virgili jentrà tal circul leterari di Mecenat e te gracie di August. Tra il 32 e il 29 al scrivè ancje lis Georgichis e in chel an al scomençà a butâ jù ancje l'Eneide. Tal 19 al cjapà su e al le in Grece, dulà che al voleve finî la sô opare, ma a Megare i cjapà une soreglade pal cjalt rapaç; no resistint al viaç indaûr, al mancjà che al jere juste sbarcjât a Brindisi par tornâ a cjase.

Viôt la pagjine des Bucolichis.

Viôt la pagijne des Georgichis.

Viôt la pagjine de Eneide.

• Ettore Paratore, Storia della letteratura latina, Firenze, Sansoni, 1957
• Paolo Fedeli, Storia letteraria di Roma, Napoli, Ferraro, 2004