Data xuliana

La data xuliana, día xulianu o DJ (JD, poles sos sigles n'inglés) ye'l númberu de díes y fraición trescurríos dende'l mediudía del 1ᵘ de xineru del añu 4713 e.C.

Pa datar fenómenos astronómicos o históricos llonxanos ye difícil considerar los cambeos qu'hubo nos calendarios de les diverses cultures. Entá considerando puramente la historia d'Europa occidental, en 1582 asocede la Reforma Gregoriana pola que se suprimen como años bisiestos los años seculares non divisibles por 400 (asina 1700, 1800 y 1900 dexen de ser bisiestos) y amás suprímense 10 díes, los que van del 5 al 14 d'ochobre de 1582. Esta reforma nun s'aceutó darréu polos protestantes y los cristianos ortodoxos, qu'aínda usen el calendariu xulianu p'afitar cada añu la fecha de la Pascua.

Si pretendemos pescudar el ralu trescurríu ente dos clises alloñaos, anque seyan del mesmu calendariu, hai que llevar cuenta de los bisiestos trescurríos, lo que se complica entá más si unu ye del calendariu xulianu y otru del gregorianu. Por esto nel mesmu añu 1582, José Scaliger de Leyden creó una escala continua de tiempu afitando'l so orixe (entamu del día 1) nel mediudía del 1ᵁ de xineru del añu 4713 e.C. del calendariu xulianu prolépticu y cuntando los díes solares correlativamente. Esti númberu llámase data xuliana. El 11 de xunetu de 1997 a les 12 h TU complétase'l día 2.450.641

Asina, si s'introduz pa la data 12,3,-3283 entiéndese l'añu 3284 e.C. La primer forma de designar la data llámase astronómica y la segunda data histórica.

La data xuliana ye una cuenta continua de díes y fraiciones cuntaos dende un puntu inicial fixu. El día 29 d'abril de 2015, a les 11:22 TU, la data xuliana ye 2457141.9736111. La parte entera (2457141) correspuende al día de 29 d'abril (dende'l mediudía pasáu hasta'l próximu mediudía); la fraición indica la fraición de día trescurrida dende l'últimu mediudía (de forma que 0,5 sería la medianueche TU).

En computación, una variable de puntu flotante de doble precisión (64 bits) dexa representar una data xuliana con 1 milisegundu de precisión.

N'astronomía, J2000.0 refierse a la data Xuliana 2451545.0 TT (Tiempu Terrestre), o 1 de xineru de 2000, mediudía TT.

Ye equivalente al 1 de xineru de 2000, 11:59:27.816 TAI, o 1 de xineru de 2000, 11:58:55.816 UTC.

Esta data úsase llargamente pa indicar un intre nel tiempu estándar pa la midida de les posiciones de los cuerpos celestes y otros acontecimientos estelares. Por exemplu, anque imperceutible a güeyu, les estrelles muévense nel espaciu, y ye necesariu, pa describir la so posición nel firmamentu, especificar la data la que se refier tala posición.

• Fernando Muñoz Box, Les Midíes del Tiempu na Historia. Calendarios y Relós, Universidá de Valladolid (2011)

• F. Muñoz Box, José Escalígero y la fecha xuliana, Documenta & Instrumenta, UCM (2009)

• F. Muñoz Box, Data Xuliana. Simplificar el calendariu, TRIM, 6 (2013)

• Dómina (astronomía)