Lutra lutra

El so cuerpu ye grande, finu y llixeramente aplanáu, suel midir ente 59 y 85 cm, a esto hai qu'añader la cola, que ye ancha na base y afilada na final -mide ente 25 y 60 cm- y representa davezu más de la metá de la llonxitú del restu. Tien pates curties y ente les dees tien una membrana qu'atapez tola so llonxitú.

El pelo ye guapo, espeso y impermeable, el color nel llombu ye marrón escuru, aclariándose pa les estremidaes, y nel bandullu ye buxu -sacante la gorxa que ye de color blancu rotu-.

Nel casu de la llundria común (Lutra lutra) habita nos ríos y llagos d'agües fríes y llimpies; polo que'l so hábitat y presencia ta en peligru, sobremanera nos países europeos indutrializaos, dada la contaminación fluvial causao polos vertíos industriales a los acuíferos.

Na Península Ibérica ye difícil vela y ye más abondante nos ríos montesinos del Cordal Cantábricu y de los Pirineos.

Nel dominiu llingüísticu asturianu tamién se-yos conoz coles variantes: llúndriga, llondria, llontra, llontria, llóntriga, llundre y londra.

•   Wikimedia Commons tien conteníu multimedia tocante a Llóndrigues europees.