HMS Beagle
Die HMS Beagle was 'n Cherokee-klas skip van die Britse Vloot. Dit is bekend as die skip waarmee Charles Darwin na Suid-Amerika gevaar het om natuurhistoriese studie te doen en plant- en dierspesies te versamel.[1] Die skip is op 11 Mei 1820 van die Woolwich-skeepswerf op die Teemsrivier te water gelaat. Nadat dit vir vyf jaar vir militêre gebruik in reserwe gehou is, is dit op 27 September 1825 as 'n navorsingskip omgebou.
Eerste reis (1826–1830)
[wysig | wysig bron]
Op 22 Mei 1826 vertrek die Beagle (vir hidrografiese opmetings) om die waters van Patagonië en Vuurland te verken. Een van die plekke wat hulle gevind het, die Beagle-kanaal, is na die skip vernoem.[2] Tydens die reis raak kapt. Pringle Stokes depressief en skiet homself. Hy sterf tien dae later. Robert FitzRoy het die kapteinskap by hom oorgeneem. Vier Vuurlanders is aan boord gebring met die doel om hulle tot die Christendom te bekeer, as sendelinge op te lei, en later weer na Vuurland terug te neem. Met sy terugkeer het die Beagle op 14 Oktober 1830 in Engeland vasgemeer.
Tweede reis (1831–1836)
[wysig | wysig bron]
Ná die eerste kaptein se selfmoord, wou kapt. FitzRoy nie die tweede reis alleen onderneem nie. Hy het iemand gesoek om hom te vergesel en het uiteindelik op Charles Darwin besluit.[3]
Die Beagle vertrek op 27 Desember 1831 om opnames in Suid-Amerika te doen. Die vier Vuurlanders wat tydens die eerste reis opgelaai is, is ook na hul eiland van geboorte teruggeneem. Op pad terug besoek hulle die Galápagos-eilande, Australië en Suid-Afrika, waarna hulle op 2 Oktober 1836 weer in Falmouth in Engeland dok.[4]
Darwin het 'n dagboek van die dinge wat hy tydens die reis gesien het gehou. Hy skryf dit later oor in 'n boek met die titel Journal and Remarks (Joernaal en kommentaar). Die boek is in 1839 as die derde volume van die amptelike verslag van die ekspedisie gepubliseer. Die boek was baie gewild en is 'n paar keer onder verskillende titels herdruk. Dit het uiteindelik as The Voyage of the Beagle (Die vaart van die Beagle) bekend geword.[5]
Derde reis (1837–1843)
[wysig | wysig bron]
In 1837 vertrek die Beagle op sy derde reis om die kus van Australië te verken. Kommandeur John Clements Wickham was in bevel gewees. Oorblyfsels van die gestrande VOC-skip Zeewijk is onder ander op die reis gevind.
Hulle begin met hulle werk aan die westelike kus tussen die Swanrivier (moderne Perth, Australië) en die Fitzroy-rivier. Daarna doen hulle opmetings langs beide kante van die Bass-straat. In Mei 1839 vaar hulle noord na die kus van die Arafurasee (teenoor Timor) vir opnames. Hierdie reis het in 1843 ten einde geloop.
Talle plekke rondom die kus het hulle name aan hierdie reis te danke. Wickham het Port Darwin ter ere van Charles Darwin genoem. 'n Nedersetting daar word in 1869 die dorp Palmerston, wat in 1911 na Darwin herdoop is.[6] Die Golf van Beagle is na die skip genoem.
Swanesang
[wysig | wysig bron]Teen die einde van sy lewe is die Beagle as 'n doeaneskip langs die kus van Essex vir teensmokkelpatrollies ontplooi. In 1870 is die skip as skrootmetaal verkoop.
Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Herbert, Sandra (1999). "An 1830s View from Outside Switzerland: Charles Darwin on the "Beryl Blue" Glaciers of Tierra del Fuego". Eclogae Geologicae Helvetiae. pp. 92: 339–346. Besoek op 22 Desember 2008.
- ↑ Browne & Neve 1989, pp. 4–7
- ↑ FitzRoy 1839, p. 638.
- ↑ R. B. Freeman (1977). "Darwin Online: Journal of Researches". Bibliographical introduction (in Engels). Geargiveer vanaf die oorspronklike op 25 Oktober 2019. Besoek op 6 Junie 2012.
- ↑ "Darwin – Northern Territory – Australia – Travel – smh.com.au" (in Engels). The Sydney Morning Herald. 8 Februarie 2004. Geargiveer vanaf die oorspronklike op 10 Oktober 2017. Besoek op 22 Mei 2010.
Eksterne skakels
[wysig | wysig bron]
Wikimedia Commons het meer media in die kategorie HMS Beagle.
Normdata  |
|
|---|