Dwaalboom

Dwaalboom is ’n nedersetting in die suidweste van die provinsie Limpopo, Suid-Afrika. Dis ongeveer ewe ver van Gaborone, Botswana en Thabazimbi, Limpopo, en suid van die Atherstone-natuurreservaat geleë. Dit vorm deel van die Thabazimbi-munisipaliteit.

Bevolking

Volgens die sensus van 2011 het Dwaalboom toe 586 inwoners gehad van wie amper 63% swart was en amper ’n derde wit. Tswana was die grootste huistaal met 220 sprekers en Afrikaans die naasgrootste met 202.

Afrikaanse kerke

Die ingebruikneming van die destydse Gereformeerde kerk Drieviersboom se kerkgebou op Dwaalboom op 20 Oktober 1990.

Dwaalboom was van 1938 tot 2008 een van die tweede bedieningspunte van die Gereformeerde kerk Drieviersboom. Die ander was Northam. Die huidige kerkgebou, wat nou behoort aan die Gereformeerde kerk Thabazimbi en waarin dienste steeds gehou word, is op 20 Oktober 1990 in gebruik geneem.

Die NG gemeente Dwaalboom was tot in 1941 die Bosveld-wyke van Zwartruggens. In 1941 het die Bosveld-wyke van Zwartruggens met Dwaalboom as middelpunt en die Bosveld-wyke van Rustenburg met Northam as middelpunt saam 'n gemeente gestig, nl. Rustenburg-Noord. In 1948 het die kerkraadslede van die Dwaalboom-wyke aansoek gedoen om afstigting en op Saterdag 23 Oktober 1948 is die gemeente Dwaalboom deur die Ringskommissie van die Ring van Krokodilrivier gestig.

Die gemeente bestaan hoofsaaklik uit bees- en tabakboere. Al skei groot afstande die lidmate van mekaar, bring Nagmaalsgeleenthede tog almal van ver en byeen. In 1951 berig Ons gemeentelike feesalbum: “Dwaalboom is 'n jong gemeente met groot moontlikhede, nie net op tydelike gebied nie, maar veral op geestelike gebied. Die verderwende invloed van die stad wat soveel menseharte kil en koud gemaak het, het nog nie sy invloed hier versprei nie. Omdat byna al ons lidmate boere is wat uit die bodem moet lewe, dwing die natuur hulle om neer te buig voor die Skepper van hemel en aarde.”

Die Hervormde Kerk se gemeente Ruskoppies is op 11 Augustus 1941 hier gestig met sy middelpunt op Plaas 9.

Bronne

(af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
(af) Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.

Eksterne skakels

(af) Die Laerskool Dwaalboom se Facebook-blad. URL besoek op 4 Julie 2016.